Jambyl oblystyq qazaq drama teatryna Asqar Toqpanovtyń esimi berile me
TARAZ. QazAqparat – Jambyl oblystyq qazaq drama teatryna qazaqtyń tuńǵysh kásibı rejısseri, halyq artısi Asqar Toqpanovtyń esimin berý boıynsha tıisti jumystar júrgizilýde, dep habarlaıdy QazAqparat.
Oblys teatryna tulǵanyń esimin berý - ónersúıer qaýymnyń kópten bergi arman-tilegi bolatyn. Teatr ujymy da sol kúndi asyǵa kútýde eken. Bul týraly atalmysh óner ordasynyń basshysy Bolat Bekjanov aıtyp berdi.
«Oblys ákimi Asqar Isabekuly osy máseleni Úkimet, Mádenıet mınıstrligi deńgeıinde kóterip, endi naqty sheshimi kútilýde. Asqar Toqpanovtyń esimi bizdiń teatrǵa berilse, ol óte durys sheshim bolady. Bul usynysty osydan 10 jyl buryn Asanáli Áshimov, Sábıt Orazbaev, Tuńǵyshbaı Jamanqulov sekildi teatr sańlaqtary kóterip, usynys hat jazyp ketken. Sonyń reti sheshilmeı kelip edi. Endi oblys basshysynyń aralasýymen másele oń sheshimin tabatyn túri bar. Teatrymyzdyń aldyna Asqar Toqpanovtyń bıýsti qoıylmaqshy. Osy jańalyqtarǵa teatr ujymy óte qýanyshty», - deıdi teatr dırektory.
Aıta keteıik, jýyrda ǵana «Qara shańyraq» atanyp ketken oblystyq qazaq drama teatry 84-shi jańa maýsymyna qadam basty. Bul elimizdegi tarıhy tereńnen tamyr tartatyn sanaýly teatrlardyń biri.
