Jambyl oblystyq «Aq Jol» gazetine jańa basshy taǵaıyndaldy
Qýat Áýesbaı Jambyl oblysynyń týmasy. Ol Ál-Farabı atyndaǵy Qazaq Ulttyq ýnıversıtetiniń jýrnalıstıka fakýltetin támamdap, Eýrazııa Ulttyq ýnıversıtetiniń magıstranty atanǵan. Alǵash qyzmet jolyn «Ana tili» respýblıkalyq gazetinde tilshi bolyp bastaǵan jýrnalıst respýblıkalyq «Aq jelken», «Halyq sózi», «Ulttyq mýzeı» basylymdarynda basshylyq qyzmet atqarǵan. 2015-2017 jyldar aralyǵynda «Astana nıýs» JShS dırektory, «Atyraý Aqparat» medıa holdıngi dırektorynyń orynbasary qyzmetterin atqardy.
Quryltaıshylardyń ortaq sheshimimen taǵaıyndalǵan jýrnalısti gazet ujymyna oblystyq Іshki saıasat basqarmasynyń basshysy Ǵalııa Boranbaeva tanystyrdy. Týǵan jerge eńbek etýge bilek sybana kelgen qoǵam belsendisi, kreatıvti azamattyń oblystyń bas gazetin alǵa jeteleýge múmkindigi mol.
«Óte qýanyshtymyn. Oblystyń bas gazetine, talaı marǵasqalardyń tabanynyń izi, qolynyń taby qalǵan qara shańyraqqa kelip, qyzmet etý, ózderińizben qaýyshý úlken mártebe, úlken jaýapkershilik. Sol senimniń, sol jaýapkershiliktiń údesinen ózderińizben birge shyǵamyz dep oılaımyn», dedi Jambyl oblystyq «Aq Jol» gazetiniń dırektor-bas redaktory Qýat Áýesbaı.
Eske sala ketsek, «Aq jol» - oblystyq gazeti 1922 jyldyń 1 mamyrynan bastap sol kezdegi Áýlıeata ýezdik Keńes atqarý komıtetiniń organy «Volnaıa bednota» gazetiniń qosymshasy retinde «Kedeı erki» degen atpen shyǵa bastaǵan. Ol tóte jazýmen 300 dana bolyp tarady. 1924 jyly tamyz aıynan «Eńbek» degen ataýǵa ıe bolyp, derbes basylym retinde shyǵa bastady. Keıinen «Dıhan daýysy», «Kolhozshy», «Kolhoz joly» degen atpen jaryq kórdi.
1939 jyly Jambyl oblysynyń qurylýyna baılanysty oblystyq gazet bolyp qaıta qurylyp, «Kommýnıst» ataýyn ıelendi. 1944 jyly «Stalındik jol», 1958 jyly «Eńbek týy», 1990 jyly «Aq jaıyq» atandy. Ár kezeńde gazettiń redaktory bolyp J. Bekturov, Ǵ. Amanǵalıev, Á. Bekmuratov, Ǵ. Sarmýrzın, T. Ońǵarbaev, B. Baısaqalov, B. Jańabaev, A. Bekbosynov, Á. Qaldybaevtar qyzmet atqardy.
