Jambyl oblystyq ádilet departamentine jańa basshy taǵaıyndaldy

TARAZ. QazAqparat – Qazaqstan Respýblıkasy Prezıdenti Ákimshiliginiń kelisýimen QR Ádilet mınıstrligi Jaýapty hatshysynyń buıryǵymen Jambyl oblysy Ádilet departamentiniń basshysy bolyp Ermek Muhıtuly Altynbekov taǵaıyndaldy, dep habarlaıdy QazAqparat oblys ákimdiginiń resmı saıtyna silteme jasap.

Ermek Altynbekov 1982 jyly Almaty qalasynda dúnıege kelgen. Qazaq gýmanıtarlyq zań ýnıversıtetin támamdaǵan. Sheffıld ýnıversıtetinde (Ulybrıtanııa) Memlekettik basqarý magıstri boıynsha bilim alǵan. Qazaqstan Respýblıkasy Prezıdentiniń «Bolashaq» stıpendııasynyń ıegeri.

«Ol 2003-2010 jyldary Oral qalalyq prokýratýrasynda prokýror kómekshisi jáne BQO prokýratýrasynda bólim prokýrory, Ortalyq aýmaqtyq kólik prokýratýrasy bóliminiń aǵa prokýrory jáne QR Bas prokýratýrasynyń basqarma prokýrory qyzmetterin atqarǵan. 2014-2016 jyldary «Samuryq-Qazyna« UÁQ AQ Zań departamentiniń aǵa zańgeri bolyp eńbek etti. 2016 jyldyń shilde aıynan QR ÁM Memlekettiń múliktik quqyqtaryn qorǵaý boıynsha departamentiniń sarapshysy, 2017 jyldyń qazan aıynan QR ÁM Halyqaralyq quqyq jáne yntymaqtastyq departamentiniń Yntymaqtastyq basqarmasynyń basshysy laýazymynda bolǵan.

Sondaı-aq, Ermek Muhıtuly 2018 jyldyń qazan aıynan bastap QR ÁM Saraptama qyzmetin uıymdastyrý departamenti dırektorynyń orynbasary qyzmetin atqarǵan.