Jambyl halqynyń 56,7 paıyzynda elektrondy densaýlyq pasporty bar
Oblystyq densaýlyq saqtaý basqarmasynyń málimetinshe, búginde oblysta medıtsına salasyn tsıfrlandyrýǵa erekshe mán berilip otyr. Aımaqta 5260 medıtsınalyq jumys orny bar bolsa, sonyń 4999-y kompıýtermen qamtamasyz etilgen. Júz paıyzdyq kórsetkishke qol jetkizý úshin oblys bıýdjetinen 152 mln teńge bólinip, 880 kompıýter satyp alyndy. Osy qarjyǵa taǵy 133 kompıýter satyp alynady.
«Jambyldyq medıtsına uıymdary eki aqparattyq júıe boıynsha jumys isteıdi - «ELSI-MED» jáne «Damu Med». Alǵashqysynda 25 uıym bar bolsa, 18 uıym «Damu Med» júıesine kóshirilgen. Aqparattyq júıelerde 8686 medqyzmetker jumys istep otyr. 631 638 elektrondy densaýlyq pasporty engizilgen. Bul - aqparattyq júıede tirkeýde turǵan halyqtyń 56,7 paıyzy» delingen habarlamada.
Aıta ketý kerek, oblystaǵy 398 medıtsına mekemesiniń 92 paıyzy, ıaǵnı 364 mekeme ınternet jelisine qosylǵan.