Jambyl GRES-inde elektr generatsııasyn arttyrý úshin úshinshi blok iske qosylady

NUR-SULTAN. QazAqparat - Turǵyndar men áleýmettik obektiler elektr energııasynan ajyratylmaıdy. Bul týraly Jambyl oblysynda ótken kóshpeli keńes barysynda Energetıka mınıstri Maǵzum Myrzaǵalıev beıindi kompanııalar men uıymdarǵa tapsyrdy.

«T.I. Batýrov atyndaǵy Jambyl GRES-i» AQ-ynyń jumys tártibi jónindegi keńesine Jambyl oblysy ákiminiń orynbasary, QR EM Atomdyq jáne energetıkalyq qadaǵalaý men baqylaý komıtetiniń, «QazTransGaz Aımaq» AQ-ynyń, «QazTransGaz» AQ-ynyń Jambyl óndiristik fılıalynyń, «Jambyl elektr jelileri» JShS jáne «Jambyl jaryq saýda 2030» JShS Baqylaý keńesiniń basshylary qatysty, dep habarlaıdy QazAqparat QR Energetıka mınıstrliginiń Instagram paraqshasyna silteme jasap.

Sondaı-aq ózekti máselelerdi talqylaýǵa onlaın-rejımde elimizdiń barlyq óńirlerinen energııamen jabdyqtaýshy jáne elektrjelilik kompanııalardyń aktsıonerleri men basshylary qatysty.
Qazaqstannyń Birtutas elektr energetıkalyq júıesiniń (BEJ) energııa tapshylyǵy bar Ońtústik aımaǵynda elektr energııasyn tutyný aǵymdaǵy jyly 12%-ǵa óskeni atap ótildi. Tutynýdyń ósýine baılanysty «KEGOC» AQ 500 kV tranzıtin soltústik-ońtústik baǵytynda artyq júkteme túsedi, elektr energııasyn generatsııasy men tutynýdyń teńgerimsizdigi paıda bolady. Elektr energııasyn óndirý múmkindigine qaraǵanda tutyný artyq. Osyǵan baılanysty Jambyl GRES-niń rezervteri paıdalanýǵa beriledi.

Jambyl GRES-niń basshylyǵy búgin elektr energııasyn óndirýdi arttyra otyryp, úshinshi blokty iske qosýǵa tehnıkalyq daıyndyǵy týraly baıandady.
Mınıstr bıylǵy jyldyń 30 qazanynda «Jambyl GRES» AQ-ynyń elektr energııasyna shekti tarıfteri bekitilgenin habarlady.
Júıelik operator kún saıyn energııa berýshi jáne energııamen jabdyqtaýshy uıymdardy qosa alǵanda, elektr energııasynyń kóterme saýda naryǵynyń sýbektileri tarapynan elektr energııasyn tutynýdyń táýliktik kestesinen aýytqýlar men buzýshylyqtardy tirkeıdi.
«Dástúrli túrde elektr energııasy men qýattyń tapshylyǵy keshki maksımaldy tutyný saǵattarynda belgilenedi. Biraq aımaq turǵyndary men aýrýhanalar men mektepter sııaqty áleýmettik nysandar elektr jaryǵynsyz qalmaýy kerek. Energetıka mınıstrligi mundaı sharalarǵa úzildi-kesildi qarsy», - dedi Maǵzum Myrzaǵalıev.

Osyǵan baılanysty Energetıka mınıstri «KEGOK» AQ-ǵa, energııa berýshi jáne energııamen jabdyqtaýshy uıymdarǵa Atomdyq jáne energetıkalyq qadaǵalaý men baqylaý komıtetimen (AEQBK) birlesip, apta sońyna deıin taldaý júrgizýdi jáne turmystyq tutynýshylardy úzdiksiz elektrmen jabdyqtaýdy qamtamasyz etý boıynsha barlyq qajetti sharalardy qabyldaýdy tapsyrdy.

Sonymen qatar, Mınıstr Jambyl GRES-iniń 4 jáne 5-shi blogyn qalpyna keltirýge kirisý mindetin qoıdy, bul bolashaqta elektr energııasyn óndirýdi ulǵaıtýǵa múmkindik berer edi.
Keńes qorytyndysy boıynsha vedomstvo basshysy «KEGOC» AQ-yna táýlik saıyn tutynýshylar jáne olardyń arasynda bólingen elektr energııasynyń kólemi týraly aqparat berýdi tapsyrdy.
Energııa berýshi kompanııalarǵa energııany asyra tutyný faktileri boıynsha, onyń ishinde «sur» maınerlerdi anyqtaý boıynsha tıisti jumys júrgizý tapsyryldy.