Jambyl aýrýhanalarynda dári-dármektiń 3 aptaǵa jetetin qory qalyptasty
Oblystyq densaýlyq saqtaý basqarmasynyń basshysy Marat Jumanqulovtyń aıtýynsha, juqpaly jáne provızorlyq aýrýhanalarda dári-dármek pen medıtsınalyq quraldar jetkilikti, atap aıtsaq, antıbıotıkter – 50,2 myń tabletka jáne 67,8 myń flakon, antıkoagýlıanttar – 9,8 myń shprıts, dene qyzýyn túsiretinder – 2 myń shısha. , vırýsqa qarsy preparattar – 15 myń tabletka.
«SK-Farmatsııa» arqyly jalpy somasy 1,2 mıllıard teńgege dári-dármek satyp alýǵa qosymsha ótinimder berilse, búginde sol qarjynyń 471 mıllıon teńgesine alynǵa dáriler oblysqa jetkizildi.
Ózbekstannan dári-dármek satyp alýǵa jergilikti bıýdjetten 544 mıllıon teńge bólindi. Búgingi tańda kórshi memleketten 24 mıllıon teńge kólemindegi dári-dármektiń alǵashqy partııasy kelip, aýrýhanalarǵa taratyldy.
«Dári-dármekke degen suranys áli azaıǵan joq. Sondyqtan ótinimdi tirkeý jáne jańa zattardy túsirý, jetkizý jumystary shapshańdyqty talap etýde. Medıtsınalyq mekemelerdiń qajettilikterine sáıkes dári-dármekterdiń ýaqytyly kelýi men durys taratylýyna qatań baqylaý jasalady», – dedi oblystyq densaýlyq saqtaý basqarmasynyń basshysy Marat Jumanqulov.
Jergilikti kásipkerler de el basyna kún týǵan osyndaı qıyn shaqta shette qalmaı, qaýipti ınfektsııamen kúres jolynda óz úlesterin qosty. Kásipkerler az qamtamasyz etilgen otbasylarǵa dári-dármek alýǵa 48 mıllıon teńge bóldi. Jalpy, oblys kásipkerleri jınaǵan jylýdyń somasy – 338 mıllıon teńge.
Dárilik zattar men medıtsınalyq maqsattaǵy buıymdar basqa elderdiń gýmanıtarlyq kómegi arqasynda da jetkizilýde.
Oblysqa Katardan, Qytaıdan, Ózbekstannan, Túrkııadan, Birikken Arab Ámirlikterinen 45 myń jeke qorǵanys quraldary jıyntyǵy, 1 myń ekspress-test, 220 lıtr antıseptık, 11,2 myń paket vırýsqa qarsy preparat, 235 paket antıbıotık jáne 8 myń paket basqa da qajetti dáriler kelip jetti.
