Jambyl aýrýhanalaryna 20 reanımobıl men 20 sanıtarlyq avtokólik alynady

TARAZ. QazAqparat - Jambyl oblysynda medıtsınalyq kómek kórsetýdi jetildirý maqsatynda 10 aýdandyq aýrýhanaǵa 20 reanımobıl alýǵa 390 mln teńge, 20 dana sanıtarlyq avtokólik alýǵa 261,2 mln teńge bólingen, dep habarlaıdy QazAqparat tilshisi.

Jambyl oblysy ákiminiń birinshi orynbasary Nurjan Kalenderovtyń óńirlik kommýnıkatsııalar qyzmetinde ótken brıfıngte bergen málimetine súıensek, densaýlyq salasyna bólingen qarjy kólemi jyldan-jylǵa artyp keledi.

Bıyl bul salaǵa 3,8 mıllıard teńge qaralǵan.

Salanyń medıtsınalyq tehnıkamen jabdyqtalý deńgeıi 91,9 paıyzdan 96,6 paıyzǵa deıin ulǵaıady dep kútilip otyr.

Budan bólek, Baızaq, Qordaı, Jýaly aýdandarynda ortalyq aýrýhanalar qurylysy jáne 3 aýdanda, atap aıtqanda, Merki, Shý, Talasta kópbeıindi aýdanaralyq aýrýhanalardy qaıta jańǵyrtý jobalarynyń qujattary ázirlenip jatyr.

«Sondaı-aq, oblysta 20 densaýlyq saqtaý nysany, onyń ishinde «Aýyldyq densaýlyq saqtaýdy jańǵyrtý» jobasy boıynsha 1,7 mıllıard teńgege 10 densaýlyq saqtaý nysanynyń qurylysy, 1,5 mıllıard teńgege 10 nysannyń kúrdeli jóndeý jumystary bastaldy», – dedi oblys ákiminiń birinshi orynbasary.

Buǵan deıin Tarazda 12 jasar qyzdyń asqazanynan 1 keliden astam shash alynǵanyn jazǵan bolatynbyz.