Jambyl aýdanynda eýropalyq úlgidegi etno-týrıstik demalys aımaǵy ashyldy
«Fortıs Konstrakshn» JShS Grodekova aýyldyq okrýgi aýmaǵynyn ashylǵan demalys ortalyǵyna búginge deıin 700 mln teńge ınvestıtsııa salǵan. Nysanǵa 10 shaqyrym elektr jelisi júrgizilip, jobada kózdelgen ǵımarattar men qurylystar boı kóterdi.
Qurylys jumystaryna 60-80 azamat jumyldyrylǵan. Jer aýmaǵy 9.6 gektardy quraıdy.
Ortalyqtyń ashylý saltanatyna QR Mádenıet jáne sport mınıstrligi Týrızm ındýstrııasy komıtetiniń tóraǵasy Dastan Rysbekov, oblystyq máslıhat tóraǵasy Abdaly Nuralıev, aýdan ákimi Erlan Qydyralyuly jáne ınvestorlar men bıznes ókilderi qatysty.
«Fortıs Konstrakshn» JShS basshysy Dosan Rymtaev qonaqtarǵa eýropalyq úlgide salynǵan ortalyqtyń múmkinshiligin jan-jaqty tanystyryp ótti.
– Oblys turǵyndary munda taýly aımaqtyń tabıǵatyn tamashalaı alady. Joba tolyǵymen aıaqtalǵanda, ortalyq bir mezette 250 adamdy qabyldaýǵa qaýqarly bolady. Demalys ortalyǵynda tek qana jazda ǵana emes, jyl on eki aı demalýǵa jaǵdaı jasalýda. Qys mezgilinde taý bókterinen shanamen syrǵanaýǵa arnalǵan jobany iske qosamyz. Barlyq ǵımarattar aýyz sý, jylýmen qamtamasyz etilgen. Sondaı-aq, atpen saıahat, kvadrotsıklmen serýen uıymdastyrylmaq. Budan bólek, 10 kıiz úı tigilýde. Jergilikti turǵyndar úshin baǵanyń qoljetimdiligine nazar aýdaratyn bolamyz, – deıdi D. Rymtaev.
Sonymen qatar, munda 70 adamǵa arnalǵan 7 kotedj, 8 qonaq úı, eýropalyq monshalar, 150 adamdy tamaqpen qamtamasyz etýge arnalǵan kafe-meıramhana, tehnıkalyq jáne servımstik nysan, úlken jáne ortasha basseınn, fýtbol, tenıs alańdary, 120 adamǵa arnalǵan ashyq demalys orny, at sporty alańshasy, balyq ósirýge arnalǵan toǵan salynǵan.
Qurylys jumystaryn nebári 10 aıda júrgizgen seriktestiktiń basshysy aldaǵy ýaqytta da ortalyqty túrlendire túsýge, birqatar qurylysty aıaqtaýǵa 300 mln teńgedeı qarajat jumsalatynyn aıtyp ótti.
Qonaqtar ortalyqtaǵy jumystardy jaqsy baǵalady.
