Jambyl Ahmetbekov shtabynyń ókilderi zaýyt jumysshylarymen kezdesti

NUR-SULTAN. QazAqparat - Nur-Sultan qalalyq komıtetiniń birinshi hatshysy, Nur-Sultan qalalyq saılaýaldy shtabynyń jetekshisi N.Orazhanov qalalyq komıtettiń aktıvimen birge Qazaqstannyń elektrotehnıkalyq qurylǵylaryn óndiretin aldyńǵy qatarly kásiporyn - «Astana elektrotehnıka zaýyty» JShS-de bolyp qaıtty. Bul týraly Qazaqstan kommýnıstik halyqtyq partııasynyń baspasóz qyzmeti habarlady.

Aıta keteıik, bul kásiporyn óndiris aýqymyn arttyrý men jetildirý qarqyny boıynsha da alda kele jatyr.

Eńbek ujymy aldyndaǵy sózinde N.Orazhanov elektrotehnıkalyq qurylǵylardy óndirý eldiń óndiris salasynda árqashanda suranysqa ıe ekendigin atap ótti. Úmitkerdiń ókili qazirgi tańda QR Parlamenti Májilisinde orynǵa ıe Qazaqstan Kommýnıstik Halyq partııasy memlekettik deńgeıde qarapaıym halyq múddesin qorǵaý boıynsha jumys atqaryp jatqanyn aıtty. «Halyq kommýnısteri» fraktsııasy halyqpen tyǵyz jumys jasaıdy, halyqtyń shaǵymdaryn qarastyryp, memlekettik organdar men mınıstrlikterge áleýmettik sıpattaǵy máseleler boıynsha depýtattyq saýaldar joldaıdy.

Úmitker, partııa jáne onyń Qazaqstan Respýblıkasy Parlamenti Májilisindegi fraktsııasy qazaqstandyq saıasattyń bel ortasynda eńbek adamy, onyń ómiri, zııatkerligi, mádenıeti men salamattylyǵy, el men qoǵamǵa qyzmet etýge degen umtylysy bolýyn talap etýdi jalǵastyrady.

«Biz, Qazaqstannyń kóptegen saılaýshylary bizdiń ekonomıkadaǵy, áleýmettik-saıası ómirdegi ustanymymyzdy qoldaıtynyna senemiz, sondyqtan Qazaqstan Respýblıkasy Prezıdentiniń saılaýynda bizdiń úmitkerge daýys berýge shaqyramyz», - dedi N.Orazhanov.

Qalalyq komıtet jetekshisi saılaýaldy baǵdarlamany tanystyryp, tuǵyrnamanyń barlyq baǵyttaryn qysqasha mazmundap berdi. Ol QKHP únemi qarapaıym azamattardyń múddesin qorǵaýǵa basymdyq berip otyratynyn atap ótti.

Qatysýshylar azyq-túlik pen kópshilik qoldanatyn taýar baǵasynyń ósýi, medıtsınalyq qyzmettiń sapasy, baspana, zeınetaqy júıesi, jalpy álemdegi jáne eldegi ekonomıkalyq jaǵdaı tóńireginde suraqtar qoıdy.

N.Orazhanov suraqtarǵa jaýap bergen soń kásiporyn qyzmetkerlerine alǵysyn bildirip, árbir azamatty QR Prezıdentiniń saılaýyna belsene qatysýǵa shaqyrdy.

Shtab jetekshisiniń aıtýynsha, úgit-nasıhat jumysy belsendi túrde atqarylyp jatyr. Shtab keńsesi jýrnalıster men sarapshylar úshin únemi ashyq, úgit-nasıhat ónimderi jetkilikti jáne úmitkerdiń saılaýaldy komandasynyń músheleri qajetti túsindirý jumystaryn júrgizýge daıyn.