Jambyl Ahmetbekov shtabynyń ókilderi aqmolalyq dárigerlermen kezdesti
Jıynda «Halyq kommýnısteri» fraktsııasynyń depýtaty Vladıslav Kosarev pen Aqmola oblystyq komıtetiniń birinshi hatshysy Beısenbaı Májıtov sóz sóıledi.
V. Kosarev Parlament Májilisindegi «Halyq kommýnısteri» fraktsııasynyń 7 depýtaty únemi qarapaıym halyqtyń áleýmettik jaǵdaıyn jaqsartýǵa qatysty bastamalarǵa uıytqy bolatynyn tilge tıek etti. Budan keıin ol QR Prezıdenttigine úmitker J.Ahmetbekovtyń saılaýaldy tuǵyrnamasynyń basym baǵyttaryna toqtalyp, medıtsına qyzmetkerlerin tolǵandyrǵan suraqtarǵa jaýap berdi.
«QKHP - 15 jyl boıy birneshe mańyzdy baǵyttarda júıeli jumys istep kele jatqan saıası uıym. Partııanyń baǵyty - aıqyn, maqsaty - myǵym. Bizdiń partııa buǵan deıin birneshe saılaýǵa qatysty. Osy turǵydan alǵanda bizde tájirıbe kóp. Biz elektoratpen qalaı jumys isteý qajet ekenin jaqsy bilemiz. Sizderdi aldaǵy saılaýǵa qatysýǵa jáne saılaýǵa kommýnısterdiń atynan qatysyp jatqan kandıdat Jambyl Ahmetbekovty qoldap daýys berýge shaqyramyn», - dedi V. Kosarev.
Sóz arasynda ol QR Prezıdenttigine kandıdat «Adal eńbek el múddesi úshin!» degen urandy temirqazyq tutatynyn aıtty.
Óz kezeginde B.Májıtov medıtsına qyzmetkerleriniń jalaqysyn kóbeıtý ózekti másele ekenin jáne bul suraq kommýnısterdiń nazarynda turatynyn atap ótti.
«QKHP atynan QR Prezıdentiniń saılaýyna túsip jatqan kandıdattyń saılaýaldy tuǵyrnamasynda «kedeıshilikpen kúres» degen baǵyt bar. Mine, dál osy baǵyt áleýmettik máselelerdi kún tártibine qoıady. Bizdiń kandıdat saılaýaldy tuǵyrnamasynda densaýlyq saqtaý salasyna, ul saýlyǵyna erekshe kóńil bólip otyr. Medıtsına qyzmetkerlerdiń jalaqysyn kóterý, zeınetaqymen qamtamasyz etý, turǵyn úı máselesin sheshý, eńbek jaǵdaıyn jaqsartý jáne basqa da áleýmettik-ekonomıkalyq máseleler ózekti bolyp qala beredi. Biz osynyń barlyǵyn sheshýge kúsh jumsaımyz. Sizderdi J.Ahmetbekovty qoldap daýys berýge jáne joǵary jalaqy alyp, zaman talabyna saı ómir súrýge shaqyramyz!» - dedi B.Májıtov.
Jıyn sońynda respýblıkalyq saılaýaldy shtab ókilderi saılaýshylardyń Qazaqstan Kommýnıstik Halyq partııasynyń prezıdent saılaýyna qatysyp jatqan kandıdatyn qoldap, daýys beretinine senim bildirdi.
