Jambyl Ahmetbekov shtaby Qarataý qalasynda saılaýshylarmen kezdesti

NUR-SULTAN. QazAqparat - Búgin Qazaqstannyń kommýnıstik halyq partııasynyń Jambyl oblystyq saılaýaldy shtabynyń jetekshisi Jarylqasyn Nurálıev Qarataý qalasyndaǵy Mádenıet úıinde saılaýshylarmen jáne eńbek ujymdarymen kezdesti. Bul jóninde partııanyń baspasóz qyzmeti habarlady.

Óz sózinde Jarylqasyn Nurálıev QKHP-nyń ınternatsıonalızm men áleýmettik ádildik sııaqty basty ustanymdaryna toqtaldy. Ol qoǵamnyń damýy ártúrli ult ókilderi arasyndaǵy beıbitshilik pen kelisimge baılanysty ekenin, QKHP árqashanda ınternatsıonalızm prıntsıpin ustanatynyn aıtty. Shtab ókili kandıdattyń saılaýaldy tuǵyrnamasyn tanystyrdy.

Sonymen qatar kezdesýde Qazaqstan bolashaǵy aldynda memleket pen azamattardyń jaýapkershiligi taqyryby qozǵaldy. Jarylqasyn Nurálıev saılaý demokratııalyq qurylymnyń mańyzdy bóligi ekenin atap ótti.

Saılaýshylar QKHP úmitkeriniń saılaýaldy tuǵyrnamasynyń tezısterin jaqsy qabyldap, kókeılerinde júrgen suraqtaryn qoıdy. Olardyń deni jumyssyzdyq, tómen jalaqy, qaladaǵy sý máselesine qatysty boldy. Nurálıev saılaýshylardy 9 maýsym kúni ótetin prezıdent saılaýyna belsene qatysyp, laıyqty úmitkerge daýys berýge shaqyrdy.