Jambyl Ahmetbekov: Saılaýaldy báseke ádil ótti
«Biz 2019 jyldyń 9 maýsymynda ótken Qazaqstan Respýblıkasy Prezıdentin saılaýdyń qorytyndysyn moıyndaımyz. Ortalyq saılaý komıssııasy jarııalaǵan nátıje halyqtyń shynaıy qoldaýyna saı dep esepteımiz. Ótken saılaý ashyq, erkin ári ádil bolǵany atap ótkimiz keledi. Saılaýaldy naýqan barysyndaǵy kúres ashyq ári ádiletti ótkenin moıyndaımyz. Bizdiń úgit jumysyn júrgizýshiler zańnama aıasynda respýblıkalyq shtabtyń josparyna saı bekitilgen barlyq qajetti sharalardy qabyldady. Ashyq ári ádiletti saılaýdy ótkizý úshin barlyq sharttar saqtaldy. Teńdiktiń konstıtýtsııalyq jáne erkin báseke qaǵıdaty saqtaldy. Saılaý qorytyndysyna yqpal etken buzýshylyqtar bolmaǵanyn málimdegim keledi», - dedi ol partııanyń ortalyq komıtetiniń keńsesinde.
Ol óz sózinde Qazaqstan Prezıdenti bolyp saılanǵan Qasym-Jomart Toqaevty quttyqtady.
«Úgit-nasıhat jumysyn belsendi ári sheber júrgizgen barlyq belsendilerge alǵys aıtqym keledi. Qazaqstan Respýblıkasy Prezıdenti saılaýynda maǵan qoldaý bildirgen barsha qazaqstandyqtarǵa rahmet! Prezıdenttiń kezekten tys saılaýy joǵarǵy bılik tranzıtiniń qorytyndy kezeńi bolatynyna, Qazaqstandy aýqymdy túrde jańǵyrtý boıynsha reformalardy júzege asyrý jumysy jalǵasatynyna senemin», - dedi Jambyl Ahmetbekov.
Kandıdat sonymen qatar osy saılaýda óz partııasynyń jeńilmegenin aıtyp ótti.
«Partııa óziniń kúsh-qýatyn qaıta jıyp, kezekti márte oblystyq komıtetterdiń jumysyn tekserdi. Parlament Májilisindegi saılaýy aldynda olarmen birge qalalyq jáne aýdandyq komıtetterdiń bári tekserildi», - dedi ol.
Eske sala ketsek, búgin QR Ortalyq saılaý komıssııasy 2019 jyldyń 9 maýsymynda ótken kezekten tys prezıdenttik saılaýda kandıdattarǵa saılaýshylardyń qansha daýys bergendigin jarııa etti.
Jambyl Ahmetbekov 167 249 daýys nemese saılaýshylardyń 1,83 paıyz daýysyn, Danııa Espaeva 478 153 daýys nemese saılaýshylardyń 5,2 paıyz daýysyn, Ámirjan Qosanov 1 472 733 daýys nemese saılaýshylardyń 16,02 paıyzyn daýysyn, Tóleýtaı Rahymbekov 294 271 daýys nemese 3,2 paıyz daýysyn, Amangeldi Taspıhov 190 304 daýys nemese saılaýshylardyń 2,07 paıyz daýysyn, Qasym-Jomart Toqaev 6 504 054 nemese saılaýshylardyń 70,76 paıyz daýysyn, Sádi-Bek Túgel 84 348 daýys nemese saılaýshylardyń 0,92 paıyz daýysyn jınady.
