Jambyl Ahmetbekov «Ońtústik» arnaıy ekonomıkalyq aımaǵynda boldy

NUR-SULTAN. QazAqparat - QR Prezıdenttigine úmitker Jambyl Ahmetbekov «Ońtústik» arnaıy ekonomıkalyq aımaǵynyń jumysshylarymen kezdesti. Bul týraly Qazaqstannyń kommýnıstik halyq partııasynyń baspasóz qyzmeti habarlady.

Jambyl Ahmetbekov jıyn qatysýshylaryna saılaýaldy tuǵyrnamasyn tanystyrdy. Ásirese, dilimizge jat batys mádenıeti men ómir standarttarynyń keri áserine erekshe toqtaldy. Sonymen qatar, otandyq taýarǵa, ásirese AÓK ónimderine tutynýshylyq suranysty yntalandyrý baǵdarlamasymen birge kedeılikpen kúresý baǵdarlamasyn qabyldaıtynyn, onyń júzege asyrylýy úshin jumys isteıtinin málimdedi.

Sondaı-aq, ol zamanaýı Qazaqstannyń basty qundylyǵy sanalatyn beıbitshilik pen ultaralyq kelisimdi saqtaý kerektigin aıtty. Egotsentrli ındıvıdýalızm kópultty Qazaqstan halqynyń biregeı mádenıetine, dilimizge, moraldyq mejemizge jat ekenin sóz etti.

Kásiporyn jumysshylary QKHP úmitkeriniń saılaýaldy tuǵyrnamasynyń tezısteri boıynsha suraq qoıyp, tushymdy jaýap aldy. Sondaı-aq, aımaqta gaz ben elektr qýatynyń joǵary tarıfteri, jumyssyzdyq, densaýlyq mekemeleriniń tapshylyǵy sııaqty máseleler kóterildi. Úmitker barlyq suraqtarǵa tolyqqandy jaýap berýge tyrysty.

Jıyn sońynda Jambyl Ahmetbekov saılaýshylardy 9 maýsym kúni ótetin prezıdent saılaýyna belsene qatysýǵa shaqyrdy.