Jambyl Ahmetbekov memlekettik tilden emtıhannan ótti
ASTANA. 17 aqpan. QazAqparat /Aıdar Ospanalıev/ - Qazaqstannyń Kommýnıstik halyqtyq partııasy atynan kezekten tys Prezıdent saılaýyna qatysýǵa ótinish bergen Jambyl Ahmetbekov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhandy sátti tapsyrdy.
Lıngvıstıkalyq komıssııanyń otyrysynan soń J.Ahmetbekovtyń emtıhanynyń nátıjelerin jarııa etken lıngvıstıkalyq komıssııa tóraǵasy Myrzataı Joldasbekovtyń aıtýynsha, úmitker aldyn ala belgilengen úsh kezeń boıynsha synaq tapsyrdy. «Ol jazba jumysyn «Astana - bas qala» taqyrybyna jazdy. Ol shyǵarmany jaqsy jazdy. Orfografııalyq qateleri joq. Tynys belgisinen 2 qate, stıldik 2 qate bar. Bizdi J.Ahmetbekovtyń sóılem quraýy, taqyrypty ashýy qanaǵattandyrdy. Ekinshi kezeńde úmitker Ahmet Baıtursynovtyń shyǵarmalaryn óte jaqsy oqydy. Onyń dıktsııasy da jaqsy, mánerlep oqýy da bári kóńilden shyqty. Úshinshi erkin taqyryp «Adam jáne tabıǵat» dep ataldy. Bul adamzatty tolǵandyryp júrgen ózekti taqyryp. Bizdiń úmitker bul taqyryptyń da tabıǵatyn ashty. Baısaldy, erkin, óte jaqsy sóıledi. Tabıǵat pen adam balasynyń arasyndaǵy baılanysty óte jaqsy túsindirip bere aldy. Biz qazir úmitkerdiń aıtqandarynan jaqsy bir áserde otyrmyz. Osylardy eskere kele lıngvıstıkalyq komıssııa músheleri J.Ahmetbekov qazaq tilin erkin meńgergen degen baılam jasap otyr»,-dedi M.Joldasbekov.
Esterińizge sala keteıik, Ortalyq saılaý komıssııasyna saılaýǵa qatysý úshin barlyǵy 15 azamat ótinish berdi. Búgingi kúnge deıin olardyń tek birnesheýi ǵana memlekettik tilden emtıhan tapsyra aldy. Olar - zańger Sálim Óten, ekolog, ǵalym Musaǵalı Dýambekov, Memleket basshysy Nursultan Nazarbaev jáne «Nur Islam» týrıstik fırmasynyń dırektory Qanat Týrageldıev. Atalǵan azamattardyń arasynda Qanat Týrageldıevten ózge azamattar osy ýaqytta qol jınaý jumystarymen aınalysýda. Al «Kenesary han» qoǵamdyq qorynyń prezıdenti Ýálıhan Qaısarov pen ýaqytsha jumyssyz Qanat Esjanov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan óte almady. Osy sebepti Ortalyq saılaý komıssııasy atalmysh úmitkerlerdi tirkeýden bas tartyp, tıisti qaýly qabyldady. Sondaı-aq Prezıdent saılaýyna qatysatyndyǵyn bildirip OSK-ǵa ótinish bergen zeınetker Záýre Masına ótinishin qaıtaryp aldy.
Ózge úmitkerler, naqtyraq aıtqanda, Pavlodar oblysynyń 55 jastaǵy turǵyny, ýaqytsha jumyssyz Nursıla Kúsetaıuly, «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın, «Attan, Qazaqstan» qozǵalysynyń jetekshisi Amantaı qajy Asylbek, 1954 jyly týylǵan jambyldyq Gúldana Toqbaeva, 1957 jyly týylǵan almatylyq Maıa Qaramaeva, 1968 jyly týylǵan Astana qalasynyń turǵyny Adalbek Qunanbaev jáne «Tabıǵat» ekologııalyq odaǵynyń tóraǵasy Mels Eleýsizov memlekettik tilden emtıhandy aldaǵy ýaqytta tapsyrady.
Osy oraıda «Attan, Qazaqstan» qozǵalysynyń jetekshisi Amantaı qajy Asylbektiń memlekettik tilden alynatyn synaqqa eki márte kelmeı qalǵandyǵyn aıta ketý kerek. Ázirge onyń emtıhandy qashan tapsyratyny belgisiz.
