Jambyl Ahmetbekov daýys berdi

NUR- SULTAN. QazAqparat - Qazaqstan kommýnıstik halyq partııasy atynan Prezıdent saılaýyna túsip jatqan Jambyl Ahmetbekov 91 jastaǵy anasymen birge kelip daýys berdi, dep habarlaıdy QazAqparat tilshisi.

Prezıdentikke úmitker óz tańdaýyn №66 mektepte ornalasqan №113 saılaý ýchaskesinde jasady.

Jambyl Ahmetbekov daýys bergennen keıin jýrnalısterge suhbat berip, tańdaý jasaýǵa otbasymen birge kelgenin aıtty.

«Bizdiń áke-sheshemiz saılaý kúni erte turyp, eldiń aldy bolyp daýys beretin. Solardan kórgen tárbıe boıynsha búgin tańnan turyp 91 jastaǵy anam men jubaıym, qyzym tórteýimiz birge keldik», - dedi Prezıdentikke úmitker.

Prezıdent saılaýyna osymen ekinshi ret túsip otyrǵan úmitker bıylǵy saıası dodanyń ereksheligine toqtaldy.

«Ol kezde kandıdattar sany az bolǵanymen, álemdik deńgeıde bedeli bar Nursultan Nazarbaev bar edi. Ol kisimen básekege túsý biz úshin qıyn edi. Al bul jolǵy saılaýda barlyq kandıdattyń múmkindigi bir dep oılaımyn», - dedi Jambyl Ahmetbekov.

Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.