«Jambyl - adaldyq alańy» sybaılas jemqorlyqqa qarsy is-qımyl jobasy bastaldy

TARAZ. QazAqparat - Jambyl oblysy ákimdiginde QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova men oblys ákimi Asqar Myrzahmetov «Jambyl - adaldyq alańy» jobasynyń jarǵysyna qol qoıdy. Bul týraly oblys ákiminiń baspasóz qyzmetine silteme jasaı otyryp, QazAqparat habarlaıdy.

Jobanyń negizgi maqsaty - sybaılas jemqorlyq deńgeıin tómendetý, sybaılas jemqorlyqqa degen jalpy tózbeýshilikti qalyptastyrý, Jambyl oblysyndaǵy memlekettik bılik ınstıtýttaryna azamattardyń senimin arttyrý. Jobanyń negizgi mindetteri - turǵyndardyń sybaılas jemqorlyqqa qarsy minez-qulyq úlgisin odan ári damytý men jemqorlyq máselesin memlekettik qyzmet kórsetý sapasyn arttyrý arqyly sheshý, turmystyq jemqorlyqty joıý, azamattar jáne bıznes úshin kedergisiz jáne qolaıly jaǵdaılar jasaý, memlekettik organdar qyzmetiniń ashyqtyǵy, aýqymdy qoǵamdyq baqylaý júrgizý.

Joba aıasynda memlekettik mekeme qyzmetkerleriniń eńbekaqysyn qaıta qaraý, mekeme basshylarynyń jeke jaýapkershiligin arttyrý, qyzmetterdiń barlyq baǵyttary boıynsha sybaılas jemqorlyqqa qarsy is-qımyldy arttyrý jáne taǵy basqa máseleler qamtylady.

 «Memleketimizdiń Prezıdenti N.Á.Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda «Sybaılas jemqorlyqtan ada óńirler» jobasy aıasynda elordanyń jemqorlyqqa qarsy strategııany júzege asyrý jónindegi tájirıbesin paıdalaný tapsyrǵan. Osy mindetti oryndaý maqsatynda Jambyl oblysynda atalǵan tájirıbe qoldanylmaq» delingen habarlamada.

Joba turmystyq sybaılas jemqorlyqty joıýǵa jáne azamattarǵa yńǵaıly jaǵdaı jasaýǵa, qoǵamdyq baqylaýdy júrgizýge, sonymen qatar sybaılas jemqorlyq mádenıetti qalyptastyrýǵa baǵyttalǵan.

Іs-shara barysynda oblys ákiminiń birinshi orynbasary Bekbolat Orynbekov óńirdegi vedomstvolyq uıymdardy ońtaılandyrý jáne jańa eńbekaqy júıesin engizý jumystarynyń júrgizilýi jónindegi baıandamasy tyńdaldy.

Atap keteıik, oblys aktıv jıynyna úkimettik emes uıymdar, basqarma basshylary, quqyq qorǵaý organdarynyń basshylary, máslıhat depýtattary, oblystyq Qoǵamdyq keńes músheleri, departament basshylary jáne medıa salasynyń ókilderi qatysty.

Jıyn sońynda oblys ákimi Jambyl jerinde bıýdjetti tıimdi paıdalanýdyń reglamenti bekitilgendigin aıtyp, osynyń arqasynda 10 mlrd. teńge únemdelgenin jetkizdi. Bolashaqta bul júıeni ózge óńirlerde de qoldanýǵa usynys berdi.

 

Ǵıbrat Sembaı