Jamby atý sportyn damytý úshin sadaq, jebe jasaıtyn sheberhanalar salý qolǵa alynbaq
ASTANA. QazAqparat - Astana qalasynda QR Ulttyq sport túrleri qaýymdastyǵynyń uıymdastyrýymen Jamby atý sportyn damytý týraly semınar ótti. Kún tártibinde Jamby atý sportyn damytý joldary, Jamby atý sportynyń erejesin bekitý, Jamby atý sportyn damytý jónindegi keńes qurý, quramyn bekitý jáne tóraǵasyn saılaý týraly máseleler qaraldy.
Bul týraly QR Ulttyq sport túrleri qaýymdastyǵynyń baspasóz qyzmeti habarlady.
Semınarǵa QR Ulttyq sport qaýymdastyǵynyń prezıdenti Bekbolat Tileýhan, QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov, QR Mádenıet jáne sport mınstrligi Sport jáne dene shynyqtyrý isteri komıtetiniń Ulttyq sport basqarmasynyń basshysy Maqsat Qoıshybaev, Mońǵolııa Respýblıkasynyń Ulttyq at sporty federatsııasynyń prezıdenti Rom Áýeshan, etnograf-zertteýshi Beken Qaıratuly, Jamby atý ónerin zertteýshi, jazýshy Úzben Qurmanbaev, Ulttyq sport mektepteri men klýbtarynyń dırektorlary, Jamby atý sportynyń jattyqtyrýshylary, QR Ulttyq sport qaýymdastyǵynyń basshylary, BAQ ókilderi qatysty.
QR USTQ 2013 jyldan bastap ultymyzdyń umyt bolǵan Jamby atý sportyn qaıta jandandyrýdy qolǵa aldy. Sodan beri birneshe ret jappaı daıyndyq sharalaryn ótkizdi. Atap aıtsaq, ótken jyldyń naýryz aıynda Astana qalasynda Mońǵolııanyń sadaq atýdan chempıony Batkeril Mıchırdi shaqyrtyp, teorııalyq jáne tájirıbelik semınar uıymdastyrdy.
Mamyr aıynda Túrkistan qalasynda barlyq oblystardyń jamby atýdy uıymdastyrýshy, jattyqtyrýshy, oıynshylardy shaqyrtyp Túrkistannyń qalalyq kitaphanasynda teorııalyq semınar ótkizip, kelesi kúni atshabarda Sadaq atýdy is júzinde kórsetti.
Odan keıin Jambyl oblysynyń Merki aýdanyna barlyq aımaqtardyń 28 sportshylaryn 12 kúndik oqý-jattyǵý jıynyna shaqyryp, sabaq ótkizdi. Olarǵa arnap Jamby atý oıynyn úırenýshige arnalǵan shaǵyn kitapsha shyǵarylyp taratyldy.
2014 jyly Jambyl oblysynyń Merki aýdanynda jáne Qyzylorda oblysynyń Jańaqorǵan aýdanynda respýblıkalyq jarystar ótkizildi. Bıyl da birqatar is-sharalar júzege asyrylmaqshy. Olar:
- «Jamby atý sportynan І-shi Halyqaralyq týrnır»;
- «Qazaq handyǵynyń 550 jyldyǵyna arnalǵan Kókpar, aýdaryspaq, teńge ilýden ІH, Jamby atýdan ІІ-shi Jastar arasyndaǵy respýblıkalyq chempıonat»;
- «M.Ǵabdýllınniń 100 jyldyq mereıtoıyna arnalǵan QR Jasóspirimder arasyndaǵy kókpar, aýdaryspaq, teńge ilýden, Jamby atýdan týrnır»;
- Konstıtýtsııamyzdyń jáne Halyqtar Assambleıasynyń 20 jyldyǵyna oraı ulttyq sport túrlerinen ótetin ІІІ festıvalda kókpar, aýdaryspaq, qyz qýý, teńge ilýmen qatar jamby atýdan da jarys ótkizý josparlanǵan.
- Qoǵam qaıratkeri A.Asqarovty eske alýǵa arnalǵan halyqaralyq týrnırde kókpar, aýdaryspaqpen jáne jamby atýdan halyqaralyq jarys ótkizilmek.
Oblystardaǵy Ulttyq sport mektepteri men klýbtarynan Jamby atý bólimderin ashý qolǵa alynýda.
Osyǵan oraı ótken jyly Monǵolııadan barlyq oblystardyń ulttyq sport mektepterine jáne jekeleı sportshylarǵa Jamby atý sportyn úırený úshin sadaqtar men jebeler satyp alynyp taratyldy.
Jamby atý sportyn kókpar, aýdaryspaq sporttarynyń dárejesine jetkizý úshin alǵysharttar jasalyp, kóptegen sharalar ótkizildi.
Munyń barlyǵy bir jaǵynan 2017 jyly elimizde ótetin EKSPO-2017 halyqaralyq kórmesi kezinde Jamby atý sporty túrinen de halyqaralyq dúbirli doda ótkizýge daıyndyq bolyp sanalady.
Jamby atý sportyn jetkilikti dárejede nasıhattap, damytý úshin arnaıy keńes quryldy.
Semınarda kóterilgen máseleler boıynsha, Jamby atý sportynyń elimizde keń qanat jaıyp barlyq oblys, qala, aýdandarǵa tarap, buqaralyq sportqa aınalýyna basa nazar aýdarýǵa, oblystar men Astana, Almaty qalalaryndaǵy ulttyq sport mektepteri men ulttyq sport klýbtarynda Jamby atý bólimderin ashyp, olardy qajetti quraldarmen, oqýlyqtarmen qamtamasyz etýge, Mońǵolııa, Vengrııa, Túrkııa elderiniń Jamby atý sportynyń bilikti mamandarymen tájirıbe almasýdy uıymdastyryp, Jamby atý sportyna qajetti qural-jabyqtar: sadaq, jebe jasaıtyn sheberhanalardy damytý máseleleri talqylandy.
