Jambyldyń Sarysý aýdanynda on jyldyq úzilisten keıin kanaldar tazalandy
ASTANA. KAZINFORM — Sharýa qojalyqtaryn sýmen qamtamasyz etý úshin Jambyl oblysynyń Sarysý aýdanynda sońǵy on jylda alǵash ret kanaldardy tazalaý jumystary qolǵa alyndy, dep habarlaıdy Sý resýrstary jáne ırrıgatsııa mınıstrligi.
«Qazsýshar» RMK Jambyl fılıaly Sarysý aýdanyndaǵy kanaldarda mehanıkalyq tazalaý jumystaryn júrgizip jatyr. Bul jumystar sońǵy 10 jyl ishinde alǵash ret Talas ózeninen Baıqadam, Igilik, Jańatalap jáne Toǵyzkent aýyldyq okrýgterine turaqty sý berýge múmkindik beredi.
Qazir Talas ózeninen sý Asa ózeni arqyly «Bóribaı-1» kanalyna jiberile bastady. Tazalaý jumystaryna Sý resýrstary jáne ırrıgatsııa mınıstrligi «Qazsýshar» RMK-nyń Jambyl fılıalyna bergen jańa arnaıy tehnıkalary tartylǵan.
Sarysý aýdanynyń turǵyndary atqarylyp jatqan jumystar úshin sý sharýashylyǵy vedomstvosyna alǵystaryn bildirip jatyr.
— Jańatalap, Baıqadam, Igilik jáne Uıym aýyldaryna 10 jyldan beri sý kelip jatqan joq. Biz «Qazsýshardyń» Jambyl fılıaly men mınıstrlikke «Bóribaı-1» kanalyn ashyp berýge usynys aıttyq. Sonyń nátıjesinde 2025 jyldyń 25 jeltoqsanynan bastap kanaldy tazalaı bastady. Buryn bul jerde kanal bolǵan, alaıda 10 jyl boıy tazalanbaǵandyqtan kómilip qalǵan edi. Qazir arnaıy tehnıka bólinip, kanal qalpyna keltirilip jatyr. Sý arnaǵa jiberilgen soń, tórt aýyldyń sharýa qojalyqtaryn sýmen qamtamasyz etýge múmkindik týady. Sebebi aýyldardaǵy mal sharýashylyǵynyń 80%-y osy sýǵa táýeldi. Byltyr klımattyń qolaısyzdyǵyna baılanysty jańbyr, sý bolǵan joq. Dese de kanaldy tazalap, aýylymyzǵa sý jetkizýge qoldaý kórsetkeni úshin mınıstrlik pen «Qazsýshar» mekemesine alǵysymdy bildiremin, — dedi Jańatalap aýylynyń turǵyny Kenjebek Yntymaqov.
Budan buryn 40 jyldan keıin alǵash ret Jetisaıdaǵy magıstraldy kanaldar tazartylyp jatqany belgili boldy.