Jambyldyń azamattyq qorǵanys basqarmasyn Erlan Imanbaev basqarady

ASTANA. KAZINFORM — Jambyl oblysy ákimdigi jumyldyrý daıyndyǵy, aýmaqtyq jáne azamattyq qorǵanys basqarmasynyń basshysy taǵaıyndaldy, dep habarlaıdy Jambyl oblysynyń ákimdigi.

— Jambyl oblysy ákiminiń ókimine sáıkes Erlan Bolatuly Imanbaev oblystyq jumyldyrý daıyndyǵy, aýmaqtyq jáne azamattyq qorǵanys basqarmasy basshysynyń mindetin atqarýshy laýazymyna taǵaıyndaldy, — delingen habarlamada.

Erlan Bolatuly 1976 jyly Jambyl oblysy Shý aýdanynda dúnıege kelgen. Bilimi joǵary.

1997 jyly Qazaq ulttyq agrarlyq zertteý ýnıversıtetin «Tutynys taýarlaryn taýarlaý», 2003 jyly M. H. Dýlatı atyndaǵy Taraz memlekettik ýnıversıtetin «Quqyqtaný» mamandyqtary boıynsha bitirgen.

Eńbek jolyn 1998 jyly Almaty qalasy Bostandyq aýdandyq ishki ister bóliminiń jedel ýákili bolyp bastaǵan. Ár jyldary ishki ister organdarynda úzilissiz qyzmet atqarǵan.

Osydan buryn Astana boıynsha ishki memlekettik aýdıt departamentiniń basshysy aýysqanyn jazǵan edik.