Jambyldyń 32 aýylynda kásipkerler ishimdik satýdan tolyqtaı bas tartqan

ASTANA. KAZINFORM — Jambyl oblysynda alkogol ónimderin satýdan bas tartqan kásipkerler sany artyp keledi, dep habarlaıdy Jambyl oblysy prokýratýrasy.

Jambyl oblysynyń prokýrory Nurǵalym Ábdirov «Zań men Tártip» tujyrymdamasyn iske asyrý aıasynda shalǵaıdaǵy aýyl turǵyndarymen kezdesýlerin jalǵastyryp jatyr. 

Máselen, 2025 jylǵy 31 shildede Qordaı aýdanynyń Kenen aýylynda kezekti issapar barysynda jergilikti turǵyndarmen quqyq buzýshylyqtardyń aldyn alý, qylmys jasaýǵa yqpal etetin jaǵdaılardy joıý, azamattar men quqyq qorǵaý organdary arasyndaǵy ózara is-qımyl máseleleri talqylandy.

Kezdesý qorytyndysy boıynsha alkogol ónimderin satýdan bas tartqan kásipkerler óz pikirlerimen bólisip, azamattyq ustanymdaryn bildirdi, al eki kásipker ákimdikpen tıisti memorandýmdarǵa qol qoıdy.

— Qoǵam tarapynan osyndaı bastamalar óńir boıynsha keń kólemde júzege asyrylyp jatyr. Búgingi tańda óńirde 32 aýylda kásipkerler alkogoldi ishimdikterdi satýdan tolyqtaı bas tartqan. Azamattyq qoǵam tarapynan kórsetilgen mundaı qoldaýlar qoǵamdyq tártipti nyǵaıtýǵa aıtarlyqtaı úles qosyp keledi. Atap aıtqanda, bıyl «alkogol satýdan bas tartqan» oblystyń 11 aýylynda birde-bir qylmys tirkelmegen, — delingen vedomstvo habarlamasynda.

Oblys prokýrory áleýmettik jaýapkershilik pen bıznestiń óńir ekonomıkasyna qosqan úlesiniń artyp kele jatqanyn, sondaı-aq prokýratýranyń kásipkerlerdiń quqyqtaryn qorǵaý boıynsha Front-ofısi men Mobıldi toptary arqyly sharalardyń kúsheıgenin atap ótti.

Osydan buryn Soltústik Qazaqstan oblysynda ishimdikten bas tartqan aýyldar sany 19-ǵa jetkeni anyqtaldy.