Jambyldyqtar jyl sońyna qaraı medıtsınalyq saqtandyrýdy belsendi júrgize bastady
TARAZ. KAZINFORM — Sońǵy eki aptada áleýmettik mańyzy bar aýrýlary bar saqtandyrylmaǵan naýqastar sany 16,5 paıyzǵa qysqardy, dep habarlaıdy Kazinform agenttiginiń tilshisi.
Mindetti áleýmettik medıtsınalyq saqtandyrý júıesine qant dıabetimen aýyratyn turǵyndar, sondaı-aq balalar tserebraldy sal aýrýyna shaldyqqan naýqastar belsendi túrde qosylyp jatyr.
Oblystyq densaýlyq saqtaý basqarmasynyń málimetinshe, osy jylǵy 25 qarashadaǵy jaǵdaı boıynsha oblysta 26 227 saqtandyrylmaǵan azamat tirkelgen bolsa, 10 jeltoqsanǵa qaraı olardyń sany 21 895 adamǵa deıin azaıǵan. Osylaısha, qysqa ýaqyt ishinde kórsetkish 4 332 adamǵa tómendegen.
Eń aıqyn oń dınamıka áleýmettik mańyzy bar aýrýlary bar naýqastar arasynda baıqaldy. Atap aıtqanda, qant dıabetimen aýyratyn saqtandyrylmaǵan naýqastar sany 1 464 adamnan 990 adamǵa deıin qysqaryp, 32,4 paıyzǵa azaıǵan. Balalar tserebraldy sal aýrýy boıynsha bul kórsetkish 19 adamnan 3 adamǵa deıin tómendegen. Sondaı-aq revmatızm men gepatıt aýrýlary boıynsha da aıtarlyqtaı qysqaryp otyr.
Jalpy, resmı statıstıkaǵa sáıkes, óńirdegi medıtsınalyq uıymdarǵa 1,2 mıllıon adam tirkelgen. Olardyń ishinde mindetti áleýmettik medıtsınalyq saqtandyrý júıesinde 942 myń adam saqtandyrylǵan, bul tirkelgen halyqtyń shamamen 80,3 paıyzyn quraıdy. Qazirgi tańda saqtandyrylmaǵan azamattar sany 230 myń adam dep baǵalanyp otyr.
Densaýlyq saqtaý basqarmasynda saqtandyrylǵandar sanynyń ósýi jumyssyz mártebesin belsendi túrde rásimdeýmen, túsindirý jumystarynyń júrgizilýimen jáne elektrondyq servıster arqyly saqtandyrý mártebesin tekserý múmkindigimen baılanysty ekenin atap ótti.
Eske sala ketsek, keshe Memleket basshysy Jambyl oblysyna jumys saparymen barǵanyn habarladyq.
Sondaı-aq buǵan deıin Jambyl oblysynda 6 jasar bala óliminen keıin bas dáriger jumysynan bosatylǵanyn jazdyq.