Jambyldyq júrgizýshi kóligin tirkemeı, jalǵan nómir paıdalanǵan

TARAZ. KAZINFORM — Mundaı quqyq buzýshylyq úshin júrgizýshi ákimshilik qamaýǵa alynyp, bir jylǵa kýáliginen aıyryldy.

Jambyl aýdanynyń ortalyq kósheleriniń birinde kezekshi patrýldik polıtsııa qyzmetkerleri kúdikti nómirdegi BMW avtokóligin baıqap, ony tekserý úshin toqtatady.

Oblystyq polıtsııa departamentiniń habarlaýynsha, tergeý barysynda júrgizýshi Grýzııadan ákelingen kólikti tirkemeı, oǵan qosa, basqa kóliktegi memlekettik tirkeý nómirin óz temir tulparyna taǵyp alǵany anyqtaldy.

Atalǵan oqıǵa negizinde quqyq buzýshyǵa qatysty QR ÁQBtK-niń 590-babynyń 3-bóligi (jalǵan nómirler qoıý) jáne 4-bóligi (kólik quralyn jalǵan nómirmen basqarý) boıynsha ákimshilik hattamalar toltyryldy. Qujattar Jambyl aýdandyq sotyna jiberildi.

Sot qaýlysymen júrgizýshi ákimshilik qamaqqa alynyp, bir jylǵa kólik júrgizý quqyǵynan aıyryldy. Kólik qamaýǵa alyndy. 

Polıtseıler qazirgi tańda jalǵan nómirlerdi paıdalaný máselesi ózekti bolyp otyrǵanyn atap ótti. Ótken jyly oblysta jalǵan memlekettik tirkeý nómirlerin ornatqan 45 adam jaýapkershilikke tartylsa, osyndaı nómirmen kólik júrgizgen taǵy 70 júrgizýshige jaza qoldanyldy.

Buǵan deıin elimizde kóligine «ádemi» memlekettik tirkeý nómirlik belgisin alýǵa 11 myńǵa jýyq adam ótinim bergeni týraly jazǵan bolatynbyz.