Jambyldyq sportshylarǵa Kóshpendiler oıyndary úshin 12,7 mln teńge berildi me
ASTANA. KAZINFORM — Jaqynda áleýmettik jelilerde Dúnıejúzilik kóshpendiler oıyndarynda júlde alǵan sportshylarǵa sertıfıkat tabystalǵanymen, ýáde etilgen aqshalaı syıaqy áli berilmegeni týraly aqparat tarady. Bul aqparattyń qanshalyqty ras ekenin Kazinform agenttiginiń tilshisi anyqtady.
Másele tek ýáde etilgen aqshanyń berilmeýimen shektelmedi. Kóshpendiler oıyndarynyń qorytyndysy jaıly ózge de jarııalanymdarǵa pikir qaldyrǵandar kókparshylardyń qarjylyq qıyndyqtarǵa tap bolyp otyrǵanyn, jarystarǵa is júzinde tek óz ynta-jigerimen qatysyp júrgenin jáne osyndaı jaǵdaıda halyqaralyq arenada Qazaqstannyń namysyn qorǵap júrgenin jazdy.
Áleýmettik jelidegi pikirlerdiń ózi sportshylarǵa ýáde etilgen aqshanyń berilmegenin dáleldeı almaıdy. Pikir jazǵandar sportshylardyń jaqyndary nemese qarjylyq jaǵdaıynan habardar tanystary bolsa da, muny naqty aıǵaq deýge kelmeıdi. Degenmen bul sózder 2024 jylǵy V Dúnıejúzilik kóshpendiler oıyndarynan keıin jambyldyq sportshylarǵa tabystalǵan aqshalaı sertıfıkattardyń jaıyn anyqtaýǵa negiz boldy.
Saýalymyzǵa jaýap alý úshin Jambyl oblysy ákiminiń apparatyna júgindik. Ótinishimiz oblys ákimdiginiń dene shynyqtyrý jáne sport basqarmasyna joldanyp, kóp uzamaı jaýap aldyq.
12,7 mln teńge tolyq kólemde tólendi
Vedomstvonyń málimetinshe, 2024 jyly Jambyl oblysynyń atynan ulttyq qurama sapynda 17 sportshy synǵa túsken. Olar 7 altyn, 7 kúmis jáne 3 qola medal ıelenip, el qorjynyna jalpy 17 júlde salǵan.
Óńirlik syıaqylardyń jalpy somasy 12,7 mln teńge bolǵan.
— Atalǵan soma 2024 jylǵy 17 qyrkúıekte demeýshilerdiń qarajaty esebinen tolyq kólemde tólendi, — delingen resmı jaýapta.
Ákimdik saıtyndaǵy aqparatqa sáıkes, sol kúni Jambyl oblysynyń ákimi Erbol Qarashókeev sportshylarmen kezdesken. Kezdesý qorytyndysy týraly resmı habarlamada olarǵa aqshalaı sertıfıkattar tabystalǵany aıtylǵan.
Alaıda basqarma qordy qalyptastyrǵan demeýshilerdiń aty-jónin, sondaı-aq qarajat alǵan sportshylar men olarǵa tólengen naqty somalardy ataǵan joq.
Vedomstvo halyqaralyq jarystardyń qorytyndysy boıynsha beriletin bir rettik syıaqylar bıýdjetten qarastyrylmaıtynyn jáne mundaı tólemder basqarmanyń tikeleı quzyretine jatpaıtynyn atap ótti. Sportshylarǵa tıisti federatsııalar men demeýshiler syıaqy bere alady.
«Áýlıe-Ata» ulttyq sport túrleri kásipqoı klýbynyń basshysy Atameken Rústemov basqarma atynan berilgen jaýapqa qol qoıǵan. Ol máseleniń jaı-japsaryna keńinen toqtalmaı, sportshylarǵa qarastyrylǵan tólemder ýaqytyly berilip jatqanyn málimdedi.
Bir oıyn — birneshe túrli syıaqy
Tólemderdiń aıyrmashylyǵyn túsiný úshin sportshylarǵa syıaqynyń birneshe jerden berilýi múmkin ekenin eskergen jón. «Kóshpendiler oıyndaryndaǵy júlde» degen uǵym ártúrli tólemdi qamtýy múmkin.
Birinshisi — V Dúnıejúzilik kóshpendiler oıyndarynyń júlde qory. Jarys bastalmas buryn oıyndar dırektsııasy seriktesterdiń jeńimpazdar men júldegerlerge syıaqy tóleýge 253 mln teńge bólgenin habarlaǵan.
Komandalyq saıystarda jeńimpazdarǵa búkil komandaǵa 10 mln teńge, kúmis júldegerlerge 6 mln, qola júldegerlerge 4 mln teńge berildi. Jekeleı saıystarda bul soma sáıkesinshe 500 myń, 300 myń jáne 200 myń teńge boldy. Al keıbir at sporty jarystarynda syıaqy kólemi bólek belgilengen.
Ekinshisi — respýblıkalyq federatsııa jarııalaǵan jeke syıaqy. 2024 jylǵy qyrkúıekte Kazinform kókpardan jeńiske jetken ulttyq quramadaǵy ár sportshy men jattyqtyrýshyǵa federatsııa prezıdenti Baýyrjan Abdrashıtov 5 mln teńgeden syıaqy beretinin habarlaǵan. Al kókbóriden jeńimpaz atanǵan ár sportshy men jattyqtyrýshyǵa 10 mln teńgeden berý josparlanǵany aıtyldy.
Úshinshisi — Jambyl oblysynyń ákimi sportshylarǵa tabystaǵan óńirlik sertıfıkattar. Basqarma ataǵan 12,7 mln teńge dál osy syıaqylarǵa qatysty.
Aı saıyn beriletin qarajat
Basqarma sportshylardy qoldaýdyń taǵy bir túri retinde ulttyq qurama sportshylary men jattyqtyrýshylaryna aı saıyn tólenetin qarjylaı qarajatty atap ótti. Onyń mólsheri Týrızm jáne sport mınıstriniń № 159 buıryǵymen bekitilgen.
Dúnıejúzilik kóshpendiler oıyndarynyń jeńimpazdaryna aı saıyn keminde 60 AEK (2026 jyly — 259 500 teńge), kúmis júldegerlerge 50 AEK (216 250 teńge), qola júldegerlerge 40 AEK (173 000 teńge) tólenedi. Al jattyqtyrýshylarǵa tıisinshe 30 AEK (129 750 teńge), 25 AEK (108 125 teńge) jáne 20 AEK (86 500 teńge) mólsherinde tólem qarastyrylǵan. Bul qoldaý sportshylar jattyǵýyn jalǵastyrǵan jaǵdaıda kelesi oıyndarǵa deıin saqtalady.
Basqarmanyń málimetinshe, V Dúnıejúzilik kóshpendiler oıyndarynyń jeńimpazdary men júldegerlerine bul tólem belgilengen tártippen berilgen.
2026 jylǵy jańa sertıfıkattar
Qyrǵyzstanda ótken VI Dúnıejúzilik kóshpendiler oıyndarynda Jambyl oblysynyń namysyn 22 sportshy qorǵady. Olar 26 medal jeńip aldy: 8 altyn, 11 kúmis jáne 7 qola.
Komanda elge oralǵan soń oblys ákimi jeńimpazdar men júldegerlermen kezdesti. Sportshylarǵa alǵys hattar, Prezıdenttiń arnaıy syılyqtary men aqshalaı sertıfıkattar tabystaldy.
Resmı habarlamada jańa syıaqylardyń naqty mólsheri men onyń qaıdan qarjylandyrylǵany kórsetilmegen. Jańa úlgidegi sertıfıkattardaǵy derekterdi eki jyl burynǵy syıaqylarmen salystyrǵanda, soma shamalas bolýy múmkin. Alaıda onyń naqty mólsheri ázirge resmı túrde rastalǵan joq.
Aıta keteıik, buǵan deıin Qasym-Jomart Toqaev VI Dúnıejúzilik kóshpendiler oıyndarynyń jeńimpazdary men júldegerlerin marapattaǵan bolatyn.
Kóshpendiler oıyndarynda Qazaqstan quramasy kókpardan Qyrǵyzstanǵa fınalda ese jiberdi.
