Jambyldyq shendiler 350 adam jumys isteıtin zaýyttyń jumysyn toqtatpaq bolǵan
ASTANA. KAZINFORM – Investorlardyń quqyqtaryn qorǵaý komıteti Jambyl oblysyndaǵy sıngapýrlyq ınvestor qatysqan iri tsement zaýytynyń quqyǵyn qorǵady.
Komıtetke ınvestorlar energııa tasymaldaýshy uıymnyń kásiporynǵa elektr energııasyn jetkizýdi shekteý áreketterine qatysty shaǵym túsirgen.
Málimetke sáıkes, bul jaǵdaı óndiristik protsestiń toqtap qalý qaýpin týǵyzyp, ınvestıtsııalyq jobanyń júzege asýyna keri áser etýi múmkin bolǵan.
«Tsement zaýyty 2024 jyly sıngapýrlyq ınvestorlardyń qatysýymen salynǵan. Jobanyń jalpy quny 73 mlrd teńgeni qurady. Kásiporynda 350 turaqty jumys orny ashylǵan», – dep habarlady komıtet.
Komıtettiń úılestirýimen energetıkalyq qadaǵalaý salasyndaǵy ýákiletti organ jospardan tys tekserý júrgizgen.
Tekserý nátıjesinde energııa tasymaldaýshy uıymnyń áreketteri negizsiz dep tanylyp, anyqtalǵan zań buzýshylyqtardy joıý týraly nusqama berildi.
Qabyldanǵan sharalardyń nátıjesinde kásiporynnyń elektrmen jabdyqtalýy tolyq kólemde qalpyna keltirilip, óndiristik protsess qaıta jolǵa qoıyldy.
«Bul zaýyttyń úzdiksiz jumysyn qamtamasyz etip, jumys oryndaryn saqtaýǵa jáne ınvestıtsııalyq jobany odan ári iske asyrýǵa múmkindik berdi», – delingen habarlamada.
Investorlardyń quqyqtaryn qorǵaý komıteti ınvestorlardyń quqyqtaryn qorǵaý, ákimshilik kedergilerdi joıý jáne kásipkerlik qyzmetke zańsyz aralasý faktilerine jedel den qoıýdy negizgi baǵyttardyń biri retinde atady.
Aıta keteıik, Jambyl oblysynda ınvestorǵa tıesili jer basqa adamǵa zańsyz berilgen.
