Jambyldyq sharýalar 890 myń tonna ónim eksporttaǵan

ASTANA. KAZINFORM — Jambyl oblysy pııaz eksporty boıynsha kósh bastap tur. Óńir ákimi Erbol Qarashókeev agrarlyq saladaǵy basty jetistikterdi baıandady. 

Aýyl sharýashylyǵynyń jalpy óniminiń kólemi 458,5 mlrd teńge. Daqyldardyń egistik alqaby 640 myń gektarǵa jetti.

— Óńirde 3,3 mln tonna ónim jınaldy, onyń ishinde 283 myń tonna masaqty dándi daqyldar, 31,3 myń tonna maıly daqyldar, 1,3 mln tonna kókónis daqyldary, 207 myń tonna kartop, 389 myń tonna baqsha daqyldary bar. Qant qyzylshasy alqabynyń 88,1%-y jınalyp, 207 myń tonna ónim alyndy, — dedi Erbol Qarashókeev Ortalyq kommýnıkatsııalar qyzmetinde.

Sonymen birge, 76 aýyl sharýashylyǵy tehnıkasy satyp alynyp, aýylsharýashylyǵy tehnıkasyn jańǵyrtý deńgeıi 5,6% jetken.

— Mal sharýashylyǵynda et óndirisi 2,7%-ǵa, sút — 1,6%-ǵa artty. 888,7 myń tonna aýyl sharýashylyǵy ónimi eksporttaldy, onyń ishinde 410 myń tonna pııaz Reseı, Qyrǵyzstan, Pákistan, Ózbekstan, Ázerbaıjanǵa jiberilgen. Pııaz eksporty boıynsha oblys kóshbasshy atandy, — dedi oblys ákimi.

Oblysta aýyl sharýashylyǵy baǵytynda paıdalanylmaǵan 61,8 myń gektar jer telimi qaıtaryldy. «Aýyl amanaty» jobasy aıasynda 2025 jyly 3,2 mlrd teńgege 437 joba qarjylandyryldy.

Aıta keteıik, Jambyl oblysynda bıznesti damytýǵa 32,5 myń kásipkerge 289,8 mlrd teńge nesıe berilgen.

Oblys Qazaqstandy strategııalyq mańyzy bar hımııa ónimderimen 100% qamtamasyz etip otyr.