Jambyldyq polıtseıler oqýshylarǵa ǵalamtor jelisindegi qaýipsizdik máselesin túsindirdi

TARAZ. KAZINFORM — Búgin Taraz qalasyndaǵy №30 mektep qabyrǵasynda erekshe sabaq ótti. Bul týraly Jambyl oblysy PD baspasóz qyzmeti málim etti.

Polıtsııa departamentiniń bastyǵy Baqytjan Malybaevpen zań týrasynda suhbat-áńgime júrgizildi. 

Polıtsııa polkovnıgi balalarǵa qoǵamdyq oryndarda júrip-turý erejeleri, joldaǵy qaýipsizdik daǵdylary týraly aıtyp, ǵalamtor jelisindegi qaýipsizdik máselesine, qoǵamda «Zań jáne tártip» qaǵıdatyn nyǵaıtýdyń mańyzdylyǵyna nazar aýdardy. 

Ashyq áńgime, sonymen qatar, oqý oryndaryndaǵy býllıng, bopsalaý, jasóspirimderdi esirtki saýdasyna tartý sekildi ótkir taqyryptardy talqylaýǵa ulasty. 

— Sizder — elimizdiń bolashaǵysyzdar. Sizderdiń bilimderińiz, tárbıelerińiz ben Otanǵa degen súıispenshilikterińiz bizdiń erteńimiz qandaı bolatynyn aıqyndaıdy, — dedi B.Malybaev oqýshylarǵa.

Oqýshylar «Polıtsııa qyzmetkeri qandaı qasıetterge ıe bolýy tıis?», «Polıtseıler qyzmette qanshalyqty jıi qaýipti jaǵdaılarǵa tap bolady?», — degen syndy ártúrli suraqtar qoıdy.

PD bastyǵy saýaldarǵa jaýap bere otyryp, kámeletke tolmaǵandardyń qatysýymen jasalǵan naqty qylmystyq derekter týraly aıtyp berdi. 

Kezdesý sońynda qatysýshylarǵa quqyqtyq normalardy bilý jáne qurmetteý qanshalyqty mańyzdy ekenin mysalmen kórsetetin qysqa beınerolıkter kórsetildi. Eń belsendi oqýshylarǵa PD bastyǵy Qaırat Joldybaıulynyń «Kemel adam» tanymdyq kitabyn tabys etti.

Mektep muǵalimderi atap ótkendeı, osyndaı ashyqtyq formatyndaǵy kezdesýler jastardyń tártip saqshylaryna degen senimin arttyrýǵa kómektesip, ýaqytynda kóterilgen máseleler men ashyq suraqtar asyǵys áreket pen qaıǵyly oqıǵalardyń aldyn alady. «Jasóspirim» jedel-profılaktıkalyq is-sharasy aıasynda ótkizilgen is-shara barysynda PD bastyǵy «dabyl» túımesiniń, beınebaqylaý kameralarynyń jumysyn tekserdi.

Eske sala keteıik, buǵan deıin Jambyl oblysynda qansha qyz balaǵa HPV vaktsınasynyń birinshi dozasy egilgenin jazǵan edik.