Jambyldyq «Qazsýshar» mekemesi 51 jańa arnaıy tehnıkamen tolyqty
ASTANA. KAZINFORM — «Qazsýshar» RMK Jambyl fılıalyna 51 jańa arnaıy tehnıka berildi, dep habarlaıdy Sý resýrstary jáne ırrıgatsııa mınıstrligi.
Sý resýrstary jáne ırrıgatsııa mınıstrligi «Qazsýshar» RMK-nyń Jambyl oblysyndaǵy fılıalyna ekskavator-júktegishter, shynjyr tabandy ekskavatorlar, traktorlar, tirkemeler, sý tasıtyn kólikter, samosvaldar, avtokrandar, tartqyshtar, tirkemeli qural-jabdyqtar, dızeldi generatorlar jáne basqa da tehnıkalardy qosa alǵanda, 51 jańa arnaıy tehnıka berdi. Fılıalǵa barlyǵy 75 tehnıka bólingen, qalǵan 24-i jyl sońyna deıin jetkiziledi. Tehnıka parki tolyqtyrylǵanǵa deıin fılıalda 64 jabdyq bolǵan.
— Fılıal qaramaǵyndaǵy avtokólik pen arnaıy tehnıkanyń sany eki eseden asty. Bul tehnıka Jambyl oblysyndaǵy sý sharýashylyǵy ınfraqurylymyn salý jáne rekonstrýktsııalaý boıynsha iri jobalardy júzege asyrýǵa, sondaı-aq bıylǵy jáne aldaǵy sýarý maýsymdarynyń turaqty ótýin qamtamasyz etýge septigin tıgizedi, — dedi Sý resýrstary jáne ırrıgatsııa vıtse-mınıstri Erbolat Ibraıhanov.
Aıta keteıik, qazir respýblıka boıynsha «Qazsýshar» RMK-nyń fılıaldaryn jańa tehnıkamen jabdyqtaý jalǵasyp jatyr. Búginge deıin kásiporyn fılıaldaryna josparlanǵan 757 arnaıy tehnıka men kóliktiń 400-den astamy jetkizildi.
Osyǵan deıin mınıstrlik «Qazsýshar» kásipornyn jalpy sany 757 tehnıkamen qamtamasyz etýdi josparlap otyrǵanyn málim etken edi.