Jambyldyq kásipkerlerdi bopsalap kelgen qazaqstandyq Reseıden elge jetkizildi

ASTANA. KAZINFORM — Reseıden uıymdasqan qylmystyq top múshesi ekstradıtsııalandy, dep habarlaıdy Bas prokýratýranyń baspasóz qyzmeti.

Qazaqstan Respýblıkasynyń Bas prokýratýrasy uıymdasqan qylmystyq toptyń quramynda qorqytyp alý jáne alaıaqtyq jasaǵany úshin qylmystyq jaýapkershilikke tartý maqsatynda Qazaqstan azamatyn Reseı Federatsııasynan ekstradıtsııalady.

Buryn sottalǵandardan quralǵan bul top 2022-2023 jyldar aralyǵynda Jambyl oblysynyń kásipkerleri men turǵyndaryna kúsh qoldanyp, bopsalaý, qaryzdy óndirip alý jáne qorǵanshylyq kórsetýmen aınalysqan.

— Uıymdasqan qylmystyq toptyń jetekshisi jáne músheleri qazirgi tańda ártúrli merzimge bas bostandyǵynan aıyryldy, al kúdikti qylmys jasaǵannan keıin jasyrynyp, soǵan baılanysty halyqaralyq izdeýge jarııalanǵan. 2024 jyldyń tamyz aıynda ol Reseı Federatsııasynyń Amýr oblysynda ustalyp, QR Bas prokýratýrasynyń suraý salýy boıynsha Otanyna ekstradıtsııalandy. Qazirgi ýaqytta kúdikti tergeý ızolıatoryna qamaldy, — delingen habarlamada.

Aıyptalǵan qylmystardy jasaǵany úshin múlki tárkilenip, jeti jyldan on bes jylǵa deıingi merzimge bas bostandyǵynan aıyrý túrindegi jaza qarastyrylǵan.

Osyǵan deıin bes jyldan beri jasyrynyp júrgen qylmysker Grýzııadan ekstradıtsııalanǵanyn jazdyq.