Jambyldyq dárigerler isikti alyp tastap, naýqastyń tómengi ernin qalpyna keltirdi
ASTANA. KAZINFORM – Jambyl oblysynda onkohırýrgter alǵash ret tómengi erinniń jergilikti taralǵan qaterli isigi bar naýqasqa bir mezette isikti alyp tastaý jáne erindi qalpyna keltirý otasyn jasady. Sonyń nátıjesinde patsıenttiń sóıleý jáne tamaq jeý múmkindigi saqtaldy, dep habarlaıdy Kazinform tilshisi.
Mundaı aýrýlardy emdeý kezinde hırýrgterdiń aldynda kúrdeli mindet turady. Olar zaqymdanǵan tinderdi tolyq alyp tastap qana qoımaı, operatsııadan keıingi aqaýdy da qalpyna keltirýi qajet. Óıtkeni rekonstrýktsııa sapasyna qaraı naýqastyń qalypty sóılep, tamaqtanyp, kúndelikti ómirine qaıta oralý múmkindigi aıqyndalady.
Oblystyq densaýlyq saqtaý basqarmasynyń málimetinshe, kúrdeli operatsııa Jambyl oblystyq kópsalaly onkologııa jáne hırýrgııa ortalyǵynda jasaldy. Sattar Appazov jetekshilik etken dárigerler toby qaterli isikti alyp tastap, moıyn lımfodıssektsııasyn, ıaǵnı lımfa túıinderi men aınalasyndaǵy tinderge hırýrgııalyq ota jasady.
Odan keıin mamandar rekonstrýktıvti-plastıkalyq operatsııa jasap, naýqastyń tómengi ernin qaıta qalyptastyrdy. Dárigerler erinniń anatomııalyq pishini men negizgi qyzmetterin qalpyna keltirdi.
Operatsııadan keıin bir aı ótken soń patsıent erkin sóılep, qalypty tamaqtana alady. Dárigerler júrgizilgen otadan keıingi estetıkalyq nátıjeniń de jaqsy ekenin atap ótti.
Medıtsına ortalyǵynyń málimetinshe, buǵan deıin óńirde onkologııalyq jáne rekonstrýktıvti kezeńderdi bir mezgilde qamtıtyn mundaı deńgeıdegi operatsııalar jasalmaǵan.
Aıta keteıik, buǵan deıin Almatyda júkti áıeldiń salmaǵy 5 keliden asatyn isigi alynǵanyn jazdyq.
