Jambyldyq 15 jastaǵy mehanık aıyna jarty mıllıon teńge tabys taýyp otyr
JAMBYL. KAZINFORM – Qazaqstandaǵy eń jas mehanık Jambylda turady. 3 jyldan beri tastóbelik turǵyndardyń kóligin jóndep júrgen jigittiń jasy qazir nebári 15-te.
– 9 jasymnan bastap kórshilerimniń, qurdastarymnyń velosıpedin jóndeı bastadym. 12 jasymda ákemniń qasynda kez kelgen mashınany shashyp-jınaı alatyn boldym. Qazir jasym 15-te. Bolashaqta avtoelektrık mamandyǵyn oqysam deımin. Aldaǵy ýaqytta qoldaý bolsa, kásibimizdi de damytqym keledi, – deıdi Baqdáýlet Isaqul.
Baqdáýlettiń jastaıynan temir-tersektiń tilin taýyp, jas mehanık atanýy beker emes. Bul — atadan balaǵa mura bolyp kele jatqan qabilet. Qazir 15 jastaǵy bala dál osy kásipti dóńgeletip, aıyna eń azy jarty mıllıon teńge tabys tabady.
– Meniń osy salaǵa degen qyzyǵýshylyǵym ákemnen kelgen. Ol da tehnıkalardy jóndeıtin. Kórshilerimizdiń kóligi buzylsa, bizdiń úıge ákeletin. Sony kórip, men de qyzyǵyp, ákemniń isin jalǵastyrdym. Óz balamdy da jastaıynan osy baǵytqa baýlyǵanyma qýanamyn. Qazirgi armanymyz – balamdy oqytyp, osy kásibimizdi órkendetý, – deıdi jas mehanıktiń ákesi Qanat Qonysbaev.
Qazir alys-jaqyn aýyldaǵy turǵyndar kóligi buzyla qalsa, Baqdáýletti izdeıdi. Tutynýshylary da oǵan «bala» dep qaramaı, temir tulparyn alańsyz senip tapsyrady eken.
– Kóligimdegi aqaýdy bir kórgennen tapty. Sóıtip, 1 kúnniń ishinde jóndep berdi. Qazir kóligimdi alyp ketýge keldim. Jas balanyń sheberligine qatty tań qalyp turmyn. Bul balanyń bolashaǵy zor. Ary qaraı da qabiletin shyńdaý kerek dep oılaımyn, – deıdi Taraz qalasynyń turǵyny Jańabek Sydymanov.
Jalpy, Tarazdan 20 shaqyrym jerdegi Tastóbede 1418 adam turady. Bul turǵyndardyń bárine nebári eki ǵana mehanık qyzmet etedi. Al Baqdáýlet bolashaqta aýylyn tanytyp, úlken ortalyq ashýdy armandaıtynyn jetkizdi.
Buǵan deıin Jambyldyń qazirgi óndiristik áleýeti týraly jazǵan edik.