Jambyldaǵy Fýrmanov kanaly sońǵy 40 jylda alǵash ret tazalandy

ASTANA. KAZINFORM — Fýrmanov aınalma kanalynyń uzyndyǵy 52 shaqyrym bolatyn bóliginde mehanıkalyq tazalaý jumystary aıaqtaldy, dep habarlaıdy Sý resýrstary jáne ırrıgatsııa mınıstrligi.

Jambyl oblysynda sońǵy 40 jylda alǵash ret Fýrmanov aınalma kanalynda mehanıkalyq tazalaý jumystary júrgizilip jatyr. Bul kanal arqyly Shý ózeniniń sýy Túrkistan oblysynyń Sozaq aýdanyna baǵyttalady.

Búginde kanaldyń 52 shaqyrymy tazartyldy. Fýrmanov aınalma kanalyn tazalaý jumysyna arnaıy tehnıkalar tartylǵan. Atap aıtqanda, 8 shynjyr tabandy ekskavator men eki tıegish.

Tabıǵatty qorǵaý maqsatynda sý jiberý maýsymy bastalǵanǵa deıin 70 shaqyrymnan astam aýmaqty tazalaý josparlanǵan. Mehanıkalyq tazalaý jumystarynyń nátıjesinde Shý ózeni arqyly júrgiziletin ekologııalyq sý jiberýdiń tıimdiligi artyp, Túrkistan oblysynyń Sozaq aýdanyndaǵy ekologııalyq jaǵdaı jaqsarady dep kútilip otyr.

Aıta keteıik, byltyr qyrkúıekten bastap bıyl sáýir aıyna deıin Shý ózeni arqyly Sozaq aýdanyna 1,5 mıllıard tekshe metrden astam sý jiberilgen bolatyn.

Fýrmanov aınalma kanalynyń jalpy uzyndyǵy — 120 shaqyrym, al ótkizý qýaty — sekýndyna 45-50 tekshe metr. Ol Jambyl oblysynyń Moıynqum aýdanyndaǵy Qylyshbaı, Qumózek, Qarabóget jáne Saryózek eldi mekenderiniń mańynan ótedi. Jergilikti turǵyndar bul jumystardyń mańyzy zor ekenin aıtyp jatyr.

— Fýrmanov aınalma kanaly biz úshin óte mańyzdy. Ol malǵa sý berýge, baý-baqsha men jaıylymdy sýarýǵa paıdalanylady. Qazir kanaldyń túbi eki metrge deıin tazalanyp, jaǵalaýlary qalpyna keltirilip jatyr. Bul istiń mańyzy zor. Sý resýrstary jáne ırrıgatsııa mınıstrliginiń qoldaýymen júrgizilip jatqan jumys Sarysý men Sozaq aýdandarynyń turǵyndaryna úlken kómek bolaryna senemiz, — deıdi Moıynqum aýdanynyń turǵyny Temirlan Aqbalaev.

Osydan buryn Qazaqstanda sýarý maýsymy aıaqtalyp, dıqandardy sýmen qamtý úshin 11 mlrd tekshe metrden astam sý alynǵany habarlandy.