Jambylda júgerini tereń óńdeıtin Ortalyq Azııadaǵy eń iri zaýyt salynady
TARAZ. KAZINFORM — Jambyl oblysynda «Shengtai Biotech Co., Ltd» jaýapkershiligi shekteýli seriktestiginiń júgerini tereń óńdeý boıynsha asa mańyzdy, aýqymdy ınvestıtsııalyq jobasyn júzege asyrý bastaldy, dep habarlaıdy oblystyq ákimdiktiń baspasóz qyzmeti.
Zaýyttyń irgetasyn qalaý rásimine Jambyl oblysynyń ákimi Erbol Qarashókeev qatysty. Jobanyń bastamashysy — bıoónimderdi óndiretin halyqaralyq Fufeng Group kompanııasy.
Zaýyttyń qýattylyǵy jylyna 500 myńnan 1 mln tonna júgeri óndirýge jetip, keıinnen 3 mln tonnaǵa deıin ósedi. Investıtsııa kólemi shamamen 420 mlrd teńgeni quraıdy.
Joba qurylys kezeńinde 6000 jumys ornyn ashýǵa, al paıdalanýǵa berilgennen keıin 1500 jumys ornyn qurýǵa múmkindik beredi (bastapqy kezeńde 400 jumys orny ashylady).
Kompanııa bıyl 2026 jyldyń ónimin óńdeý úshin 300 myń tonna júgeri satyp alýdy josparlap otyr. Kásiporyn jambyldyq sharýalarmen ofteık-kelisimsharttar jasasyp, ózara tıimdi áriptestiktiń berik negizin qalaýdy kózdeıdi.
Júgerini tereń óńdeý qosymsha quny joǵary ónimder — amınqyshqyldary (leıtsın, valın, ızoleıtsın, glýtamın, tsıtrýlın), krahmal, glıýkoza alýǵa múmkindik beredi. Qaldyqsyz óndiris jolǵa qoıylady: dándi daqyldardyń qaldyqtaryn mal azyǵy retinde paıdalaný josparlanýda.
Erbol Qarashókeev Memleket basshysy Qasym-Jomart Toqaevtyń tapsyrmasyna sáıkes agroónerkásip keshenindegi ınvestıtsııalyq jobalardy júzege asyrýdyń mańyzdylyǵyn atap ótti.
— El Prezıdenti óńdelgen aýyl sharýashylyǵy ónimderiniń úlesin 70 paıyzǵa jetkizý mejesin qoıdy. Basym baǵyttardyń biri — dándi daqyldardy tereń óńdeý. Búgingi joba — bul mindettiń is júzinde júzege asýynyń jarqyn kórinisi. Zaýyt egistikten bastap tutynýshyǵa deıingi qosylǵan quny joǵary ónim óndiretin birtutas júıeni qalyptastyrady. Bul biregeı joba Qazaqstannyń barlyq ońtústik óńirlerinde agroónerkásip keshenin damytýǵa tyń serpin berip, jergilikti aýyl sharýashylyǵy taýaryn óndirýshilerge turaqty tabys ákeledi, — dedi Erbol Qarashókeev.
«Fufeng Group Limited» basqarma tóraǵasy Lı Sıýechýn uzaq merzimdi ınvestıtsııalyq yntymaqtastyq týraly aıta kele, Jambyl oblysynyń áleýeti zor ekenin atap ótti. Sondaı-aq memleket tarapynan kórsetilgen qoldaýǵa alǵysyn bildirdi.
Jambyl oblysynyń ınvestıtsııalyq qorjynynda 10 myńnan astam jumys ornyn qurýdy kózdeıtin, jalpy quny 3,6 trln teńgeni quraıtyn 82 joba bar.
2025 jyldyń 3 aıynda 120,5 mlrd teńge ınvestıtsııa tartyldy, bul ótken jyldyń sáıkes kezeńimen salystyrǵanda 37,1 paıyzǵa artyq.
Bıyl jalpy quny 175,2 mlrd teńgege 30 jobany iske asyrý josparlanyp otyr.
Osyǵan deıin Jambyl oblysynda bolat óndiretin jańa zaýyttyń qurylysy bastalǵany belgili boldy.