Jambylda jyl basynan beri vandalızmge qatysty 82 quqyq buzýshylyqtyń joly kesildi
ASTANA. KAZINFORM — Zańsyz jazý jazyp, qoǵamdyq múlikti búldirgender ákimshilik jaýapkershilikke nemese qylmystyq jazaǵa tartylýy múmkin, dep habarlaıdy Kazinform agenttiginiń tilshisi.
Oblystyq polıtsııa departamenti qabyrǵalarǵa jazý jazý, eskertkishter men abattandyrý nysandaryn búldirý jaýapkershilikke ákep soǵatynyn eske saldy.
Jyl basynan beri óńirde vandalızmge qatysty 82 quqyq buzýshylyqtyń joly kesilgen. Vedomstvo málimetinshe, árbir fakti boıynsha tıisti shara qabyldanady.
Jaza quqyq buzýshylyqtyń mán-jaıyna baılanysty taǵaıyndalady. Mysaly, memleket qorǵaýyna alynǵan eskertkishter men tabıǵı nysandardy qorlaǵany úshin QR Qylmystyq kodeksiniń 294-babynda aıyppul salý, túzeý nemese qoǵamdyq jumystarǵa tartý, sondaı-aq qamaýǵa alý kózdelgen. Al mundaı áreket top bolyp, birneshe ret nemese bapta kórsetilgen ózge de aýyrlatatyn mán-jaılar kezinde jasalsa, úsh jylǵa deıin bas bostandyǵynan aıyrý jazasy qoldanylýy múmkin.
Buǵan deıin Kazinform Mańǵystaý oblysynda Ybyqty saı shatqalyn qorlaǵany úshin polıtsııa 34 jastaǵy kúdiktini ustap, qylmystyq is qozǵaǵanyn habarlaǵan bolatyn.
Sondaı-aq Astanada eki jas Jýrnalıster alleıasyndaǵy músin men jeti ýrnany búldirgen. Olar ustalyp, kámeletke tolmaǵandardyń ata-analary ákimshilik jaýapkershilikke tartyldy.
Vandalızmmen kúresý úshin Qazaqstanda vandalızm qaýpi joǵary aımaqtardyń kartasyn jasaý usynyldy. Ol patrýldeý, beınebaqylaý jáne jaryqtandyrýdy kúsheıtý qajet jerlerdi anyqtaýǵa múmkindik beredi.
