Jambylda jasóspirimder arasyndaǵy janjaldardan keıin 4 ákimge qatań sógis berildi
ASTANA. KAZINFORM — Jambyl oblysynda kámeletke tolmaǵandar qatysqan rezonansty oqıǵalardan keıin birqatar laýazymdy tulǵa tártiptik jaýapkershilikke tartyldy. Tórt aýdannyń ákimi men oblystyq bilim basqarmasynyń basshysyna qatań sógis jarııalandy, dep habarlaıdy Kazinform tilshisi.
Jasóspirimder arasyndaǵy qylmys, kámeletke tolmaǵandar quqyq buzýshylyǵynyń sebepteri jáne aldyn alý jumystarynyń tıimdiligi oblys ákimi Erbol Qarashókeevtiń tóraǵalyǵymen ótken arnaıy jıynda qaraldy.
Oblys ákimi jaýapty memlekettik organdardyń jumysyn synǵa alyp, profılaktıkalyq sharalardyń kóbine formaldy túrde ótkizilip, kútken nátıje bermeıtinin atap ótti.
Onyń aıtýynsha, jumystyń tıimdiligin ótkizilgen ashyq sabaqtar, trenıngter, saýalnamalar men reıdterdiń sanymen emes, naqty nátıjesimen baǵalaý qajet.
Jıyn qorytyndysy boıynsha oblys ákiminiń orynbasaryna sógis jarııalandy. Baızaq, Jambyl, Talas jáne Qordaı aýdandarynyń ákimderi men oblystyq bilim basqarmasynyń basshysyna qatań sógis berildi. Sondaı-aq atalǵan aýdandar ákimderiniń osy baǵytqa jaýapty orynbasarlaryna da qatań tártiptik jaza qoldaný kózdelgen.
Budan bólek, polıtsııa departamentiniń bastyǵyna tórt aýdandyq polıtsııa bóliminiń basshylaryna qatysty qyzmettik tekserý júrgizý tapsyryldy.
Eske salaıyq, buǵan deıin óńirde kámeletke tolmaǵandar qatysqan birneshe rezonansty oqıǵa bolǵan.
Qazan aıynda Baızaq aýdanynyń Baızaq aýylynda jasóspirimder arasyndaǵy janjaldan 2011 jyly týǵan bala qaza tapty. Osy oqıǵaǵa baılanysty qylmystyq is qozǵaldy.
