Jambylda etıl spırtin zańsyz óndirgen uıymdasqan qylmystyq top ustaldy

ASTANA. KAZINFORM — Kóleńkeli aınalymnan quny 280 mln teńgeden asatyn 122 myń lıtr etıl spırti tárkilendi, dep habarlaıdy QMA Jambyl oblysy boıynsha departamenti.

Qazir «BM» JShS men onymen baılanysy bar ózge de kompanııalar basshylyǵyna qatysty qylmystyq top quryp, zańsyz kásipkerlik qyzmetpen aınalysqanyna qatysty tergeý júrgizilip jatyr.

Tergeý deregine saı, Mahmadov Sultannyń basshylyǵymen áreket etken uıymdasqan qylmystyq top mindetti lıtsenzııasyz Jambyl oblysy aýmaǵynda aktsızdeletin ónim — etıl spırtin jappaı óndirý, saqtaý, tasymaldaý jáne ótkizý qyzmetin júrgizgen.

Aıta ketý kerek, Mahmadov 2010 jyly dál osyndaı qylmys úshin sottalǵan. Zańsyz áreketti jasyrý maqsatynda kúdiktiler óz jumysyn bıoetanol men mal azyǵyna arnalǵan qospalardy zańdy túrde óndirý retinde kórsetken. Alaıda is júzinde seriktestik aýmaǵynda ónerkásiptik kólemde etıl spırtin óndirýge tolyq jabdyqtalǵan jasyryn spırt zaýyty uıymdastyrylǵan. Uıymdastyrýshylar birneshe óńirdi qamtıtyn ótkizý jelisin qurǵan.

— Etıl spırtin jetkizýdiń turaqty arnasy jolǵa qoıylyp, ol Jambyl jáne Shyǵys Qazaqstan oblystarynda, sondaı-aq Shymkent qalasynda ornalasqan jasyryn tsehtarǵa jóneltilip otyrǵan. Bul tsehtarda jetkizilgen spırtten turǵyndardyń densaýlyǵyna eleýli qaýip tóndiretin sýrrogat alkogol ónimderi daıyndalǵan. Jedel-tergeý is-sharalarynyń nátıjesinde kóleńkeli aınalymnan quny 280 mln teńgeden asatyn 122 myń lıtr etıl spırti tárkilendi. Sonymen qatar, óndiristik baza aýmaǵynda júrgizilgen tintý barysynda 18 dana maınıng jabdyǵy anyqtaldy. Qazirgi ýaqytta tárkileý maqsatynda 7 avtokólikke tyıym salyndy. Uıymdastyrýshy 2 aı merzimge qamaýǵa alyndy. Tergeý jalǵasýda, — delingen habarlamada.

Buǵan deıin QMA Jetisý oblysynda turǵyn úı qurylysy kezinde qarjy jymqyrý deregin tekserip jatqanyn jazdyq.