Jambylda vegetatsııa kezeńinde sharýalardan shaǵym túsken joq

TARAZ. KAZINFORM – Jambyl oblysynda vegetatsııalyq kezeń sátti aıaqtaldy. Bıyl sharýalardan shaǵym túsken joq.

«Jambyl oblysynda 113 sý qoımasy bar. Olarǵa 136,6 mln tekshe metr sý sııady. Sý qoımalarynyń 60-y kanal, 53-i erigen qar, jer asty sýlary men ózender arqyly toltyrylady. Bıylǵy vegetatsııalyq kezeńde 91,2 mln tekshe metr sý jınaldy. Jınaqtalǵan sýdyń kólemi bekitilgen 10 myń gektar alqapty turaqty sýmen qamtamasyz etýge múmkindik berdi. Sharýalardan sýdyń jetispeýshiligine qatysty shaǵym túsken joq» deıdi bul jóninde Jambyl oblysy ákimdiginiń Tabıǵı resýrstar jáne tabıǵat paıdalanýdy retteý basqarmasynyń basshysy Oljas Baqqaraev.

Sondaı-aq bıyl 9 sý qoımasyn jóndeý josparlanyp, onyń jeteýinde jumystar tolyq aıaqtaldy. Qalǵan ekeýi jyl sońyna deıin tapsyrylady. Budan bólek, 5 sý qoımasyna kúrdeli jóndeý jumystaryn júrgizý kózdelip otyr.

Jalpy keshendi josparǵa sáıkes 203 kanaldy qaıta jańǵyrtý mindeti tur. Búginde jobalyq-smetalyq qujattamalary ázirlenip, Islam damý banki, sondaı-aq bıýdjet esebinen jóndeý jumystary kezeń-kezeńimen atqarylady. Al «Qazsýshar» RMK oblystyq fılıaly dırektorynyń mindetin atqarýshy Erbol Ábdirahmanov 4 myńǵa jýyq sharýamen kelisimshart jasalyp, 90,078 gektar jerge 533,1 mln tekshe metr sý berilgenin aıtady.

Aıta ketsek, biz buǵan deıin Atyraý oblysynda Jaıyqtaǵy sý tasqynynan keıin 4 kanal tereńdetilip jatqanyn jazǵan edik.