Jambylda úsh aıda 235 VIP memlekettik nómir tirkelgen
TARAZ. KAZINFORM – Byltyrdan bastap elektrondyq portal arqyly «Avtokólikke VIP nómirge tapsyrys berý (joǵary suranystyń memlekettik tirkeý nómiri belgisi)» servısi iske qosylǵany belgili. Atalǵan servıs arqyly jeke tulǵalar kólikterine aqyly túrde joǵary suranysqa ıe, ádemi memlekettik tirkeý nómirlerin alýǵa tapsyrys bere alady.
Ótken jyldyń 12 aıynda Jambyl oblysynda osy qyzmetti paıdalana otyryp, mamandandyrylǵan bólimder jáne sektorlar arqyly barlyǵy 171 mln 579 myń 523 teńgege 577 joǵary suranysqa ıe memlekettik tirkeý nómiri rásimdelgen. Bul týraly Óńirlik kommýnıkatsııalar qyzmetiniń baspasóz alańynda №2 mamandandyrylǵan halyqqa qyzmet kórsetý bóliminiń basshysy Marsel Jetpisbaev habarlady.
«Osy jyldyń qańtar-naýryz aılary aralyǵynda joǵary suranysqa ıe 235 VIP memlekettik nómir tirkeldi. Olardyń jalpy quny 74 mln 787 myń 374 teńgeni quraıdy jáne bekitilgen AEK sommasy respýblıkalyq bıýdjetke túsedi. Jalpy, 010, 077, 080, 707, 800, 888 jáne 777 tsıfrlyq belgileri bar memlekettik tirkeý nómirlik belgilerine suranys kóp», - dedi bólim basshysy brıfıngide.
Eske sala keteıik, buǵan deıin Jambyl oblysynyń esirtki qylmysyna qarsy bólimshe bastyqtary qamaýǵa alynǵanyn jazǵan edik. Sondaı-aq Jambyl oblysynda 40 keliden astam esirtki daıyndaǵan shopan ustalǵanyn habarlaǵan bolatynbyz.
