Jambylda sýarý júıesi jańǵyrtylyp, sý únemdeý kólemi artty
ASTANA. KAZINFORM – 69 shaqyrym kanal men 241 gıdrotehnıkalyq nysan modernızatsııasy: Jambyl oblysynda Oń jaǵalaý magıstraldyq kanalynyń sýarý jáne drenaj júıelerin rekonstrýktsııalaý aıaqtaldy.
Sý resýrstary jáne ırrıgatsııa mınıstrliginiń Sý sharýashylyǵy komıteti Jambyl oblysy Shý aýdanyndaǵy Oń jaǵalaý magıstraldyq kanalynyń sýarý jáne drenaj júıelerin qaıta jańǵyrtý jumystaryn tolyq aıaqtady. Qazirgi tańda nysandar paıdalanýǵa berildi.
Joba aıasynda gıdromelıoratsııalyq ınfraqurylym keshendi túrde jańǵyrtyldy. Atap aıtqanda, 69 shaqyrym sýarý kanaly qaıta jańartylyp, 241 gıdrotehnıkalyq nysan qalpyna keltirilip, jańǵyrtyldy. Sonymen qatar 17,5 shaqyrym kollektorlyq-drenaj jelisi rekonstrýktsııalandy. Bul sýarmaly alqaptardy sýmen qamtamasyz etý júıesiniń senimdiligi men tıimdiligin edáýir arttyrýǵa múmkindik berdi.
Júrgizilgen jumystardyń nátıjesinde sýarý jelisiniń paıdaly áser koeffıtsıenti 44%-ǵa deıin ósti. Sonyń arqasynda sýdy tasymaldaý kezinde bolatyn shyǵyn aıtarlyqtaı azaıady. Jyl saıyn sýarý maýsymynda 12-14 mln tekshe metrge deıin sý únemdeledi dep kútilip otyr. Jobany iske asyrý Shý aýdanynyń Qonaev, Dýlat jáne Balýan Sholaq aýyldyq okrýgterindegi jalpy aýmaǵy 5 172 gektar aýyl sharýashylyǵy jerin tolyqqandy sýmen qamtamasyz etýge múmkindik berdi.
— Oń jaǵalaý magıstraldyq kanalynyń sýarý jáne drenaj júıelerin rekonstrýktsııalaý jumystarynyń aıaqtalýy — elimizdiń sý qaýipsizdigin nyǵaıtýǵa, sý resýrstaryn tıimdi paıdalanýǵa jáne transshekaralyq ózender basseınindegi sýarmaly eginshilikti damytýǵa baǵyttalǵan mańyzdy qadam. Bul joba aýyl sharýashylyǵy daqyldarynyń ónimdiligin arttyrýǵa, agrarlyq óndirýshilerdiń tabysyn kóbeıtýge jáne óńirdiń agroónerkásip kesheniniń turaqty damýyna qolaıly jaǵdaı jasaıdy, — dedi Sý resýrstary jáne ırrıgatsııa mınıstrligi Sý sharýashylyǵy komıtetiniń tóraǵasy Arsen Jaqanbaev.
Aıta ketelik Qazaqstan men Aljır sý resýrstary salasyndaǵy ekijaqty yntymaqtastyqtyń jol kartasyn ázirlemek.
