Jambylda saýda zańyn buzǵan 82 kásipker jaýapqa tartyldy
ASTANA. KAZINFORM — Jyl basynan beri Jambyl oblysynda saýda zańnamasyn buzǵan 82 kásipkerlik nysany ákimshilik jaýapkershilikke tartyldy. Bul týraly QR Saýda jáne ıntegratsııa mınıstrligi ókilderiniń óńirge jumys sapary barysynda málim bolyp, bazarlardy jańǵyrtý men ónimsiz deldaldardy qysqartý máseleleri de talqylandy. Bul týraly vedomstvonyń baspasóz qyzmeti málim etti.
QR Saýda jáne ıntegratsııa mınıstrligi Saýda komıteti tóraǵasynyń orynbasary Dáýlen Qabdýshev jumys saparymen Jambyl oblysyna bardy. Sapar barysynda saýda bazarlaryn jańǵyrtý, óńirdiń óndiristik áleýetin damytý jáne QR Premer-mınıstri Oljas Bektenovtiń ónimsiz deldaldardy joıý jónindegi tapsyrmasynyń oryndalý barysy qaraldy.
Jumys saparynyń negizgi baǵyttarynyń biri — Taraz qalasyndaǵy saýda bazarlaryn jańǵyrtý jumystary boldy. 1997 jyldan beri jumys istep kele jatqan «Saltanat» bazary jańǵyrtýdan keıin shaǵyn kásipkerlikti damytýǵa
qolaıly jaǵdaı jasap otyr. Bazarda 25 saýda orny bar Jobany iske asyrýǵa 140 mln teńge ınvestıtsııa tartylǵan. Qazir bazarda qurylys-montaj jumystary tolyq aıaqtalyp, nysan belgilengen tártippen paıdalanýǵa berildi.
«ıAkka saraı» bazaryndaǵy qurylys jumystary da tolyq aıaqtalǵan. Al «Jibek joly» bazarynda jańǵyrtý jumystary jalǵasýda. Joba aıaqtalǵannan keıin saýda nysany saýdany uıymdastyrý, qaýipsizdik jáne kásipkerlik qyzmetti
júrgizý boıynsha zamanaýı talaptarǵa tolyq sáıkes bolady.
Jumys sapary barysynda Dáýlen Qabdúshev óńirdegi birqatar óndiristik kásiporyndardyń qyzmetimen de tanysty. Atap aıtqanda, 140 adam eńbek etetin jáne jylyna 6 660 tonna ónim óndiretin kondıterlik fabrıkaǵa bardy. Sondaı-aq delegatsııa «Hlebnyı dar» kásipornyn jáne jylyna 70 myń tonnaǵa deıin qus etin óndiretin elimizdegi iri óndirýshilerdiń biri «Alel Agro» AQ-ny aralady. Kezdesýler barysynda otandyq óndiristi damytý, ishki naryqty
sapaly ónimmen qamtamasyz etý, sondaı-aq óndirýshilerdiń saýda jelileri men naryqtarmen ózara is-qımylyn nyǵaıtý máseleleri talqylandy.
Sonymen qatar sapar aıasynda Qazaqstan Respýblıkasynyń Premer-mınıstri Oljas Bektenovtiń áleýmettik mańyzy bar azyq-túlik taýarlaryn ótkizý tizbegindegi ónimsiz deldaldardy joıý jónindegi tapsyrmasynyń oryndalýyna erekshe nazar aýdaryldy. Jyl basynan beri Jambyl oblysynda óńirlik komıssııanyń 23 otyrysy ótkizilip, onyń qorytyndysy boıynsha kásipkerlik sýbektileriniń 46-sy ákimshilik jaýapkershilikke tartyldy.
— Bazarlardy jańǵyrtý men ónimsiz deldaldardy qysqartý — bir birimen tikeleı baılanysty jumys. Saýda nysandaryn jańǵyrtýdyń basty maqsaty — óndirýshi men tutynýshy arasynda tikeleı baılanysty qamtamasyz etip, ádil ári ashyq saýda ortasyn qalyptastyrý. Jergilikti atqarýshy organdar saýda nysandaryn jańǵyrtý jumystaryn ýaqytyly ári sapaly aıaqtaýǵa jaýapkershilikpen qaraýy, sondaı-aq ónimsiz deldaldardyń úlesin azaıtý baǵytyndaǵy jumysty júıeli túrde jalǵastyrýy qajet. Otandyq óndirýshilerge, kásipkerlerge jáne tutynýshylarǵa teń ári qolaıly jaǵdaı jasaý — mańyzdy mindet, — dedi Dáýlen Qabdýshev.
Sonymen qatar memlekettik baqylaý sharalary da belsendi jalǵasýda. Jyl basynan beri Jambyl oblysynda jalpy somasy 6 mln teńgeden asatyn 82 ákimshilik qaýly shyǵaryldy. Onyń ishinde 58 qaýly saýda ústemesiniń shekti mólsherin 15 paıyzdan artyq asyrǵany úshin, al 24 qaýly taýarlarǵa ártúrli baǵa qoldanǵany úshin qabyldandy.
Saýda zańnamasynyń saqtalýyn baqylaý jáne taýar ótkizý tizbeginiń ashyqtyǵyn qamtamasyz etý mınıstrlik qyzmetiniń basym baǵyttarynyń biri bolyp qala beredi.
Buǵan deıin mınıstrlik júrgizgen tekseris nátıjesinde 4 843 kásipkerdiń baqylaý-kassa mashınalaryn tirkemeı bólshek saýdamen aınalysqany, al 5 846 sýbektiniń tirkelgen POS-termınaldary joq ekeni anyqtalǵan bolatyn. Sonymen qatar tabysyn tómendetip kórsetýge áreket jasaǵan 247 kásipker anyqtalyp, olarǵa qatysty qosymsha taldaý men hronometrajdyq tekserýler taǵaıyndaldy.
