Jambylda polıtsııadan qashqan júrgizýshi sholaq myltyqpen ustaldy

ASTANA. KAZINFORM — Jambyl oblysynda polıtseılerdiń qyraǵylyǵynyń arqasynda kúdikti ustalyp, qylmystyq is boıynsha tergeý bastaldy, dep habarlaıdy Kazinform agenttiginiń tilshisi.

Oblystyq polıtsııa departamentiniń habarlaýynsha, Jańatas qalasynda patrýldeý kezinde tártip saqshylary Audi kóligin baıqaǵan. Júrgizýshiniń kúmándi áreketteri polıtsııa nazaryn aýdarǵan. Tártip saqshylarynyń toqtaý týraly zańdy talabyna baǵynbaı, ol jasyrynýǵa tyrysqan.

— Polıtsııa qyzmetkerleri dereý qýǵyn uıymdastyryp, nátıjesinde kólik toqtatylyp, júrgizýshi ustaldy. Qýǵyn kezinde kúdikti qolyndaǵy kúmán týdyratyn zattan qutylmaq bolǵan. Alaıda polıtsııa bul áreketti baıqap qalyp, oqıǵa ornynan 16 kalıbrli qosaýyz myltyqtyń sholaq nusqasyn (obrez) tapty, — dep málimdedi departamentten.

Atalǵan derek boıynsha sotqa deıingi tergeý amaldary bastaldy. Tabylǵan qarý saraptamaǵa jiberildi. Qazirgi tańda kúdiktiniń Sarysý jáne kórshiles aýdandarda jasalǵan qylmystarǵa qatysy bar-joǵy tekserilip jatyr.

Budan buryn Jambyl oblysynyń 3 aýdanynda quqyqtyq tártipti kúsheıtý tapsyrylǵanyn jazǵanbyz.