Jambylda polıtseıdi kólikpen qaǵyp ketken mas júrgizýshi sottaldy

ASTANA. KAZINFORM — Jambyl oblystyq soty mas kúıde kólik aıdap, polıtsııa qyzmetkerin qaqqan júrgizýshi N.-ǵa qatysty qylmystyq isti apellıatsııalyq tártipte qaıta qarady.

Vedomstvo málimetine sáıkes, ol Qylmystyq kodekstiń 380-babynyń 3-bóligi — bılik ókiline densaýlyqqa qaýipti emes kúsh qoldaný boıynsha jaýapqa tartylǵan.

Alǵashqy sot anyqtaǵandaı, 2025 jyldyń tamyzynda N. óz kóliginen nómirin alyp tastap, jolda kele jatyp syra ishken. «Batys Qytaı – Batys Eýropa» trassasynda joǵary jyldamdyqpen qozǵalǵan ol polıtsııanyń toqtaý talabyna baǵynbaı, qashyp ketken.

Taraz qalasy baǵytynda kele jatqan kólik týraly habarlama alǵan polıtsııa qyzmetkeri A. ony toqtatýǵa áreket jasaǵan. Alaıda N. talapty elemeı, polıtsııa qyzmetkerin qaǵyp ótken. Ol kóliginiń janarmaıy taýsylǵan soń ǵana ustalǵan.

N.-nyń kinási beınejazbalar, hattamalar jáne kýágerlerdiń aıǵaqtarymen dáleldendi.

Prokýror N.-ǵa 2 jylǵa bas bostandyǵynan aıyrý jazasyn surady. Sottalýshy kinásin moıyndap, keshirim surady. Jábirlenýshi polıtsııa qyzmetkeri sottalýshyny keshirmeıtinin aıtyp, sheshimdi sottyń quzyretine qaldyrdy.

Turar Rysqulov aýdanynyń soty kináni moıyndaýyn, ókinýin jáne jeke basynyń jaǵymdy sıpattamasyn jeńildetetin mán-jaı dep tanyp, N.-ny 2 jylǵa bas bostandyǵynan aıyrý jazasyna kesken.

Advokattyń shaǵymy boıynsha isti qaraǵan apellıatsııalyq sot N.-nyń kámeletke tolmaǵan balalary bar ekenin jáne buryn sottalmaǵanyn eskerip, úkimdi ózgertip, jaza túrin jeńildetti. N.-ǵa 2 jylǵa bas bostandyǵyn shekteý jazasy taǵaıyndaldy. Sot aktileri zańdy kúshine endi.

Budan buryn tarazdyq tártip saqshylary mas júrgizýshini trassa boıymen qýalap, qolǵa túsirgenin jazǵan edik.