Jambylda mektep ashanasynan jappaı ýlanǵandardyń jaǵdaıy belgili boldy

Jambyl oblysy Baızaq aýdany N.Kıikbaev atyndaǵy orta mektebinde oqıtyn Baızaq aýdanynyń ortalyq aýrýhanasyna jatqyzylǵan 35 adamnyń jaǵdaıy ortasha, turaqty, dep habarlaıdy Kazinform. 

Bul týraly Jambyl oblysy ákimdiginiń baspasóz qyzmeti málimdedi. Naýqastarǵa barlyq qajetti medıtsınalyq kómek kórsetilip jatyr.

Bul másele boıynsha Jambyl oblysynyń ákimi Erbol Qarashókeevtiń tapsyrmasymen arnaıy komıssııa quryldy.

Sarykemer aýylyndaǵy N.Kıikbaev atyndaǵy mektep-gımnazııasynyń oqýshysynyń álsizdikke, qusý boıynsha shaǵymdanǵan alǵashqy ótinishi 7 qarasha kúni tústen keıin tirkelgen bolatyn.

Jambyl oblysy ákiminiń tapsyrmasyna sáıkes, respýblıkalyq mamandardan, anestezıologtardan, pedıatrlardan, toksıkologtardan jáne ınfektsıonısterden turatyn komıssııa quryldy.

Saǵat 23.00-ge deıin ótinish bildirgenderdiń jalpy sany – 46 adam (2 muǵalim, 44 bala).

46 adamnyń 33-i aýrýhanaǵa jatqyzyldy, jaǵdaıy ortasha, turaqty.

Aýrýhanaǵa jatqyzylǵandarǵa detoksıkatsııa terapııasy júrgizildi. Antıbıotıkalyq emdeýdi qajet etpeıtin 13 adam medıtsınalyq keńes alǵannan keıin ambýlatorııalyq emdeý jáne úıden baqylaý úshin qaıtaryldy.

Jalpy praktıka dárigerlerinen, pedıatrdan, ýchaskelik medbıkeden turatyn 16 mobıldi top 205 aýlany aralap, osy kúni oqý ornynyń ashanasyna kelgen qalǵan oqýshylardy tekserý júrgizildi.

Tekserý qorytyndysy boıynsha olardyń jaǵdaıy qanaǵattanarlyq jaǵdaıda, shaǵymdar men aýrý belgileri joq.

N.Kıikbaev atyndaǵy mektep-gımnazııasyn tamaqpen qamtýǵa jaýapty JK «Toqseıitovtiń» jumysy mán-jaılar naqtylanǵanǵa deıin toqtatyldy. Mektep oqshaýlanǵan, bakterıologııalyq zertteý sharalary júrgizilip jatyr.

Aıta keteıik, buǵan deıin Jambylda 48 bala men eresek mektep ashanasyndaǵy tamaqtan ýlanǵanyn habarlaǵan bolatynbyz.