Jambylda qorshaǵan ortany lastaǵan kásiporynǵa 54,9 mln teńge aıyppul salyndy

ASTANA. KAZINFORM — Jambyl oblysynyń Ekologııa departamenti júrgizgen tekserý barysynda KMK kásipornynyń aǵyndy sýlarynda ruqsat etilgen normadan joǵary lastaýshy zattar anyqtalǵan, dep habarlaıdy Sarysý aýdandyq sotynyń baspasóz qyzmeti.

Atap aıtqanda, tazartýdan keıingi synamalarda otteginiń hımııalyq tutynýy, temir, nıtrıt, fosfat, nıtrat jáne bıologııalyq ottegi tutyný kórsetkishteri shekti mólsherden asyp ketken.

Tekserý nátıjesinde kásiporyn Ekologııalyq kodeks talaptaryn buzǵany úshin ákimshilik hattama toltyryldy.

Sot otyrysynda kásiporyn dırektory kórsetilgen zańbuzýshylyqtardyń bolǵanyn moıyndaǵanymen, aǵyndy sýdyń naqty kólemi aktide kórsetilgennen az bolǵanyn aıtty. Alaıda kásiporynnyń kinási tekserý materıaldarymen, zerthanalyq taldaýlarmen jáne qujattarmen tolyq dáleldendi.

— Zańnamaǵa sáıkes, qorshaǵan ortaǵa zııan keltirgen zańdy tulǵalarǵa lastaýshy zattardyń asyp ketken kólemi úshin aıyppul salynady. Bastapqyda aıyppul mólsheri 78,5 mln teńgeden asqanymen, zańda kózdelgen jeńildikke baılanysty ol 30 paıyzǵa qysqartyldy. Nátıjesinde sot KMK kásipornyn kináli dep tanyp, 54,9 mln teńge kóleminde aıyppul saldy. Sot qaýlysy zańdy kúshine endi, — delingen habarlamada.

Budan buryn Pavlodarda kásiporyndardyń qorshaǵan ortany lastaý lımıtinen asyp ketý jaǵdaılary tirkelgenin jazǵanbyz.