Jambylda qolóner men qyzǵaldaqqa arnalǵan qos festıval ótedi
ASTANA. KAZINFORM — Týrızm jáne sport mınıstrligi bekitken 2026 jylǵa arnalǵan týrıstik «zákirlik» is-sharalar kúntizbesi aıasynda Jambyl oblysynda óńirdiń mádenı jáne tabıǵı týrızmin damytýǵa baǵyttalǵan eki iri halyqaralyq is-sharany uıymdastyrady. Bul týraly vedomstvonyń baspasóz qyzmeti málim etti.
«Taraz — qolónershiler qalasy» halyqaralyq qolónershiler festıvali 2026 jylǵy 23 sáýirde «Kóne Taraz» tarıhı-etnomádenı kesheninde ótedi.
Festıvaldiń ashylýy saǵat 10:00–de Dombyra Party baǵdarlamasymen bastalady. Kún boıy qonaqtarǵa kıiz úıler qalashyǵynda kontserttik baǵdarlamalar, Almaty, Túrkistan jáne shetelden kelgen sheberlerdiń kórmeleri men sheberlik sabaqtary usynylady. Kórmeler «Kórkemsýret» galereıasynda, «Qolónershiler úıinde», sondaı-aq keshenniń ashyq alańdarynda uıymdastyrylady.
Keshki baǵdarlama saǵat 19:00–de bastalyp, ulttyq kıimder kórsetilimin jáne HasSak etno-folklorlyq ansambli, «Qońyr» toby, Narkenje Serikbaeva jáne ózge de ónerpazdardyń qatysýymen gala-kontsertti qamtıdy. Sonymen qatar kórme zalynda ASPARA FASHION WEEK halyqaralyq sán aptalyǵynyń XVII maýsymy kórsetiledi.
«Qyzǵaldaq mura» halyqaralyq festıvali 2026 jylǵy 25 sáýirge josparlanǵan. Іs-shara Talas aýdanyndaǵy Eseıhan aýylynyń mańynda ótedi. Festıval Jambyl óńirin Greıg qyzǵaldaǵynyń tarıhı otany retinde tanytýǵa jáne ekologııalyq týrızmdi damytýǵa baǵyttalǵan.
— Festıval baǵdarlamasynda 20 kıiz úıden turatyn etnoaýyl, sahna, ulttyq sport túrlerine arnalǵan alańdar, fýdkort jáne taqyryptyq fotozonalar qarastyrylǵan. Qonaqtar oblystyq fılarmonııa ártisteriniń kontsertin, «Qyzǵaldaqtyń shyǵý tarıhy» atty teatrlandyrylǵan qoıylymdy tamashalap, óńirdiń týrıstik nysandaryna tanymdyq ekskýrsııalarǵa qatysa alady. Sondaı-aq ulttyq oıyndar men salt-dástúrler kórsetilip, «Qymyzmuryndyq» rásimi uıymdastyrylady, — delingen habarlamada.
Festıval aıasyndaǵy erekshe oqıǵalardyń biri — halyqaralyq ekologııalyq bastama: Nıderland Koroldigi Jambyl oblysyna óńir aýmaǵyna otyrǵyzý úshin 40 000 qyzǵaldaq pııazshyǵyn tabystaýdy josparlap otyr.
Atalǵan festıvalder óńir ekonomıkasynyń damýyna serpin berip, týrıster aǵynyn arttyrýǵa, ınfraqurylymdy jetildirýge jáne shaǵyn ári orta bıznesti qoldaýǵa yqpal etedi.
Jambyl oblysy turǵyndar men el qonaqtaryn osy jarqyn is-sharalarǵa qatysyp, óńirdiń baı mádenı murasy men erekshe tabıǵı kelbetin tamashalaýǵa shaqyrady.
Buǵan deıin Jambyl oblysynda OA-da teńdesi joq amınqyshqyldar óndiretin joba iske qosylǵanyn jazǵan edik.
