Jambylda qyzylshamen aýyrǵan naýqastar sany kóbeıdi

Jambyl oblysynda 20 qarashadaǵy jaǵdaı boıynsha qyzylshamen aýyrǵan 2 124 adam tirkeldi. Bul týraly óńirlik kommýnıkatsııalar alańynda ótken baspasóz konferentsııasynda oblystyq sanıtarlyq-epıdemıologııalyq baqylaý departamentiniń basshysy aıtty, dep habarlaıdy Kazinform. 

Aýrý oblystyń barlyq aýdanynda anyqtalǵan. Biraq eń kóp jaǵdaı Taraz qalasynda. Oblys ortalyǵynda qyzylshamen aýyrǵandar sany –1339, Merki aýdanynda –150, Baızaqta – 148, Shý aýdanynda 134 adam tirkelgen.

Departament basshysynyń aıtýynsha, qyzylshaǵa qarsy qosymsha jappaı ımmýndaý óńirde 7 qarashadan bastalǵan. Jyl basynan beri 10 aıda oblys boıynsha josparly túrde jalpy 39471 bala atalǵan aýrýǵa qarsy ekpe alǵan. Qyzylshamen aýyrǵandardyń basym bóligi, 82 paıyzy – balalar.

Buǵan deıin Jambyl oblysynda qyzylsha aýrýy órship turǵanyn jazǵan bolatynbyz.