Jambylda qant zaýyty men qyzylsha ósirýshiler satyp alý baǵasyn kóterýge kelisti
ASTANA. KAZINFORM — Zaýyt úleskerleri men qyzylsha ósirýshilerdiń kezdesýinde baǵa máselesi talqylandy. Nátıjesinde taraptar bir ymyraǵa kelip, satyp alý baǵasy kelisine 13 teńgege deıin kóterildi.
Ótken jumada Merke qant zaýytyna qant qyzylshasynyń alǵashqy júk kóligi keldi. Mundaǵy jaǵdaı sharýalardyń da, zaýyt basshylyǵynyń da kóńilinen shyqpaǵandyqtan, taraptar kezdesip, yntymaqtastyq sharttaryn talqylaýdy jón kórdi.
Dıalog barysynda sharýalar óz esepterin usynyp, satyp alý baǵasyn kóterý qajettigin eskertti. Nátıjesinde zaýyt baǵasy kelisin 10 teńgeden 13 teńgege kóterýge kelisti. Memleket qosymsha 25 teńge sýbsıdııalaýdy jalǵastyryp, sharýalar úshin jalpy baǵany kelisin 38 teńgege deıin jetkizedi. Sharýalar buǵan deıin 15 teńge suraǵan bolatyn.
Zaýyt alǵashqy 5 kúnde táýligine 2 myń tonna qyzylsha qabyldasa, 15 qazannan bastap óńdeý kólemin 4 myń tonnaǵa jetkizýdi josparlap otyr.
Fermerler zaýyttaǵy jaǵdaıdyń bıyl birshama turaqty ekenin atap ótti. Ótken maýsymdaǵydaı kezek kútý nemese jumystyń turalap qalý máselesi bolmaıdy. Byltyr zaýyt shamadan tys júktemeniń saldarynan shıkizatty tolyqtaı qabyldaýǵa shamasy kelmedi. Olar bıylǵy maýsymda zaýytqa 200-250 myń tonnadan asa qyzylsha túspeıdi dep eseptep otyr.
Degenmen, kelesi jyly dıqandar áli de satyp alý baǵasynyń 15 teńgege deıin kóterilýinen úmitti. Olar buǵan Taraz qant zaýytynda jańa óńdeý jelisiniń iske qosylýy jáne Baızaq aýdanynda taǵy bir nysannyń salynýy yqpal etedi dep josparlap otyr.
Buǵan deıin aımaqtaǵy qant zaýyty men qyzylsha ósirýshiler kelisimge kele almaı otyrǵanyn jazǵan bolatynbyz.