Jambylda kafeden tutanǵan órt saýda ortalyǵynyń shatyryna taraǵan
ASTANA. KAZINFORM — Jambyl oblysynda saýda ortalyǵyndaǵy órtten zardap shekkender joq, dep habarlaıdy oblystyq TJD baspasóz qyzmeti.
Búgin Merki aýdanynyń Merki aýylynda kafeniń as úıinen shyqqan órt eki qabatty saýda ortalyǵynyń shatyryna tarady.
Oqıǵa ornyna joǵarylatylǵan shaqyrý dárejesi boıynsha TJM kúshteri, «Aýyl qutqarýshylary» eriktileri, polıtsııa qyzmetkerleri jáne tirshilikti qamtamasyz etý qyzmetteri jedel túrde jetti.
— TJM qyzmetkerleri men «Aýyl qutqarýshylary» eriktileriniń úılesimdi áreketteriniń arqasynda órt qysqa merzim ishinde tolyq sóndirildi. Órt sóndirý bólimsheleri kelgenge deıin saýda ortalyǵynan 20 adam ózdiginen evakýatsııalandy. Zardap shekkender joq, — delingen habarlamada.
Qazir órttiń shyǵý sebebi anyqtalyp jatyr.
Budan buryn Astananyń Baıqońyr aýdanynda, Tolstoı kóshesinde bir-birine jaqyn ornalasqan úsh jeke turǵyn úıden órt shyqqanyn jazǵanbyz.
