Jambylda Fýrmanov kanalynda 40 jylda alǵash jasalǵan mehanıkalyq tazalaý aıaqtaldy

ASTANA. KAZINFORM — Mehanıkalyq tazalaý Qylyshbaı, Qumózek, Qarabóget jáne Saryózek atty tórt eldi mekenniń boıymen ótetin kanaldyń sý ótkizý qýatyn arttyrýǵa múmkindik beredi, dep habarlaıdy Sý resýrstary jáne ırrıgatsııa mınıstrligi.

Mınıstrlik basshysy Nurjan Nurjigitov Jambyl oblysyndaǵy sý sharýashylyǵy ınfraqurylymyn damytý jobalarynyń júzege asyrylý barysymen tanysyp, jergilikti turǵyndarmen kezdesti.

Shý aýdanynda mınıstr ırrıgatsııa jáne drenaj júıelerin jetildirý jobasynyń ekinshi kezeńi aıasynda atqarylǵan jumystardyń nátıjelerimen tanysty.

Bıyl jalpy uzyndyǵy 69,7 shaqyrymdy quraıtyn 15 kanaldy rekonstrýktsııalaý jumystary aıaqtalyp, olardyń boıyna 240 gıdrotehnıkalyq qurylys ornatyldy. Sonymen qatar 55 baqylaý uńǵymasy burǵylandy. Qazirgi ýaqytta nysandardy paıdalanýǵa berý jumystary júrgizilip jatyr.

Tekserý barysynda Nurjan Nurjigitov jergilikti turǵyndarmen jáne merdiger uıym ókilderimen kezdesý ótkizip, jobany belgilengen merzimde aıaqtaýdy qamtamasyz etýdi tapsyrdy.

Moıynqum aýdanynda mınıstr Fýrmanov gıdrotorabyndaǵy jóndeý jumystarymen tanysty. Shý ózeninde ornalasqan bul nysan Túrkistan oblysynyń Sozaq aýdanyna ekologııalyq maqsatta sý jiberýge arnalǵan. Byltyr gıdrotorapta segmentti qaqpa aýystyrylǵan bolatyn.

Moıynqum aýdanynyń Qarabóget aýylynda Nurjan Nurjigitov eldimekenge aparatyn kireberis avtojoldaǵy kópirdiń qurylys barysyn tekserdi. Uzyndyǵy 78,3 metrdi quraıtyn bul nysan Shý ózeniniń arnasy arqyly qaýipsiz ári jyldam qatynasty qamtamasyz etýge múmkindik beredi.

Sondaı-aq mınıstr uzyndyǵy 120 shaqyrym, eni 30-40 metr bolatyn Fýrmanov aınalma kanalynda 40 jylda alǵash ret júrgizilgen mehanıkalyq tazalaý jumystarynyń nátıjelerimen tanysty. Bul jumystar bıyl shilde aıynda bastalyp, 25 jeltoqsanda aıaqtaldy. Tazalaý jumystaryna 9 shynjyrtabandy ekskavator jáne 2 tıegish tehnıka jumyldyryldy. Mehanıkalyq tazalaý Qylyshbaı, Qumózek, Qarabóget jáne Saryózek atty tórt eldi mekenniń boıymen ótetin kanaldyń sý ótkizý qýatyn arttyrýǵa múmkindik beredi. Nátıjesinde Túrkistan oblysynyń Sozaq aýdanyna sý jiberý tıimdiligi artady.

Eske sala keteıik, ótken vegetatsııaaralyq kezeńde ekologııalyq maqsatta Sozaq aýdanyna Shý ózeninen 1,5 mlrd tekshe metr sý jiberilgen bolatyn. Qazirgi ýaqytta Moıynqum aýdanynda Shý ózeninde retteýshi gıdrotehnıkalyq qurylys salý jáne ózen túbin tazalaý jobasy ázirlenip jatyr.

— Kelesi jylǵa jasalǵan boljamdardy eskere otyryp, oblystaǵy sý sharýashylyǵy nysandarynyń barynsha daıyndyǵy men tıimdi jumys isteýin qamtamasyz etý qajet. Qazirgi jaǵdaıda sýarý maqsatynda bolsyn nemese tabıǵatty qorǵaý úshin júrgiziletin sý jiberýler bolsyn, sýdy dál ári ádil bólý burynǵydan da mańyzdy bolyp otyr. Sondyqtan júrgizilip jatqan barlyq qurylys-montajdaý jáne tazalaý jumysyn ýaqytyly aıaqtaý qajet, — dedi Sý resýrstary jáne ırrıgatsııa mınıstri Nurjan Nurjigitov.

Budan buryn Senat sý resýrstaryn qorǵaýǵa arnalǵan zańdy maquldaǵany habarlandy.