Jambylda esirtki tasymaldaǵan Astana qalasynyń turǵyny ustaldy

TARAZ. KAZINFORM — Jambyl oblysynda polıtsııa esirtki arnasynyń jolyn kesti, dep habarlaıdy Polisia.kz.

Jambyl oblysy polıtsııa departamenti esirtki qylmysyna qarsy is-qımyl basqarmasy men patrýldik polıtsııa batalonynyń qyzmetkerleri jedel-izdestirý is-sharalaryn júrgizý barysynda Almaty — Ekaterınbýrg avtojolynyń 430-shaqyrymynda Toyota Camry kóligin toqtatty. Qyzmettik-izdestirý ıtiniń kómegimen kóliktiń júksalǵyshyn tekserý kezinde jolaýshyǵa tıesili sporttyq sómkeden skotchpen oralǵan paket tabyldy. 

— Pakettiń ishinde ózine tán ıisi bar krıstall tárizdi zat bolǵan. Saraptama qorytyndysyna sáıkes, tárkilengen zat jalpy salmaǵy 470,07 gramm bolatyn alfa-PVP sıntetıkalyq esirtki zaty bolyp shyqty, — delingen aqparatta. 

Atalǵan derek boıynsha QR Qylmystyq kodeksiniń 297-babynyń 3-bóligimen sotqa deıingi tergep-tekserý bastaldy. Kúdikti, 34 jastaǵy Astana qalasynyń turǵyny ýaqytsha ustaý ızolıatoryna qamaldy. Tergeý amaldary jalǵasyp jatyr.

Buǵan deıin aımaqta shekaradan 30 keli esirtki alyp ótpek bolǵan sheteldik ustaldy.