Jambylda er adam súıiktisine bergen 2,5 mln teńgeni qaıtarýdy talap etti
ASTANA. KAZINFORM — Jambyl oblysy Qordaı aýdandyq soty 2,5 mln teńgeni óndirip alý týraly daýǵa núkte qoıdy.
Qordaı aýdandyq sotynda azamat A.-nyń azamatsha O.-ǵa qatysty negizsiz baıytý somasyn óndirip alý týraly talap qoıýy boıynsha azamattyq is qaraldy.
Talap qoıýshy onyń otbasyn qurý nıetimen shamamen 4-5 aı boıy atalǵan qyzben jaqyn qarym-qatynasta bolǵanyn atap ótti. Talap qoıýshy jaýapkerge jáne onyń eki balasyna qarjylyq qoldaý retinde aqsha jiberip otyrǵan. Baılanys toqtatylǵannan keıin talap qoıýshy barlyq aqshany qaıtarýdy talap etken. Biraq jaýapker qaıtarýdan bas tartyp, ony buǵattap tastaǵan.
Talap qoıýda er adam jaýapkerden 2,5 mln teńge jáne memlekettik bajdy óndirip alýdy surady.
Jaýapker talap qoıýdy moıyndamady jáne talap qoıýshynyń ózi óz erkimen materıaldyq kómek kórsetýge keliskenin, aqshany dári-dármekterge, kıimge jáne basqa da shyǵyndarǵa jiberip otyrǵanyn túsindirdi.
— Sot aqshany talap qoıýshynyń óz erkimen aýdarǵanyn jáne óteýsiz materıaldyq kómek sıpatynda bolǵanyn anyqtady. Qaıtarymdylyq ne taraptar arasynda sharttyq mindettemelerdiń bolýy sharttarynda aqsha berýdiń dáleli berilgen joq. Sot sheshimimen talap qoıýdy qanaǵattandyrýdan bas tartyldy. Sheshim zańdy kúshine endi, — delingen sot taratqan aqparatta.
Buǵan deıin Jambyl oblysynda enesiniń atyna nesıe rásimdegen kelin sottalǵanyn jazǵan edik.
